მინდა ვუთხრა ყველას: ბატონებს და ქალბატონებს, ერს და ბერს, მოკლეენიანებს და გრძელენიანებს, არ არის ქილიკის დრო. თუ ვინმეს შენიშვნის სურვილი აქვს, აი, ბატონო კლინიკა, შეუძლიათ მობრძანდნენ და ჩვენთან ერთად იმუშაონ იმ სივრცეში, რასაც სასიკვდილო სივრცე ჰქვია,- ამის შესახებ თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის დირექტორმა, ლევან რატიანმა განაცხადა. მისი თქმით, კორონავირუსის წინააღმდეგ საბრძოლველად სახელმწიფოს მიერ შემუშავებულ გაიდლაინთან დაკავშირებით დიდი აჟიოტაჟი ატყდა. რატიანის შეფასებით, საქართველოს მთავრობამ გააკეთა ის, რისიც „ყველა წამყვან ქვეყანას შურს და ამის მაგალითი არის ინფიცირების დაბალი დონე, ლეტალობის დაბალი და გამოჯანმრთელებულების მაღალი ინდექსი“.

„ევროპული საქართველოს“ ერთ-ერთი ლიდერის გიგა ბოკერიას განცხადებით, პარტია არ დაუჭერს მხარს საგანგებო მდგომარეობის გაგრძელებას, თუ ხელისუფლების მხრიდან არ იქნება წარმოდგენილი კონკრეტული ეკონომიკური გეგმა.

თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის დირექტორის ლევან რატიანის განცხადებით, ამ ეტაპზე კლინიკაში სულ 118 პაციენტია მოთავსებული, საიდანაც covid19 დადასტურებული აქვს 91 მათგანს. რატიანის ინფორმაციით, კლინიკის რეანიმაციულ განყოფილებაში მოთავსებული სამი პაციენტის მდგომარეობა კრიტიკულია, ხოლო ექვსის - სტაბილურად მძიმე.

ამერიკული WTI-ის მარკის ნავთობის ფასი, პირველად ისტორიაში, უარყოფით ნიშნულამდე დაეცა და ამ დროისთვის ბარელის ღირებულება -37.63 აშშ დოლარს შეადგენს, - ამის შესახებ ინფორმაციას „ბისისი“ ავრცელებს.

ანაკლია-განმუხურის საკარანტინო სივრცეში ამ დროისთვის 36 პირია, ხოლო ფოთის ტირ - პარკში ტრაილერის 72 მძღოლი იმყოფება.

ქუთაისის ინფექციურ საავადმყოფოში კორონავირუსით ინფიცირებული ახალგაზრდა მამაკაცი შეიყვანეს. პაციენტს თურქეთში მოგზაურობის ისტორია აქვს და ერთ - ერთ საკარანტინო სივრცეში იმყოფებოდა. როგორც ქუთაისის ინფექციური საავადმყოფოს ექიმი თემურ ნადირაძე აცხადებს, ახალი პაციენტის ჯანმრთელობის მდგომარეობა სტაბილურია.

ჩრდილოეთ კორეის ლიდერი კიმ ჩენ ინი, რომელსაც ცოტა ხნის წინ გულის ოპერაცია ჩაუტარეს, სავარაუდოდ, მძიმე მდგომარეობაშია, - ამის შესახებ ინფორმაციას ტელეკომპანია CNN-ი ავრცელებს. ტელეკომპანიის ინფორმაციით, ეჭვი კიმ ჩენ ინის ჯანმრთელობის მძიმე მდგომარეობის შესახებ მას შემდეგ გაჩნდა, რაც ის ბაბუის იუბილესთან დაკავშირებით გამართულ საზეიმო ღონისძიებას არ დაესწრო.

გაეროს წევრმა ქვენებმა გენერალურ ასამბლეაზე მიიღეს რეზოლუცია, რომელიც ითვალისწინებს თანაბარ და დროულ წვდომას კორონავირუსის ვაქცინაზე, რომელსაც მომავალში მიიღებენ. რეზოლუცია ასევე ხაზს უსვამს პანდემიასთან ბრძოლის დროს მსოფლიო ჯანდაცვის ორგანიზაციის უმნიშვნელოვანეს როლს და კიდევ ერთხელ მოუწოდებს მსოფლიოს ქვეყნებს თანამშრომლობისკენ.

იტალია მიმდინარე კვირის ბოლოსთვის კორონავირუსის გამო დაწესებული ზომების მოხსნის გეგმას გაასაჯაროებს. ამის შესახებ ქვეყნის პრემიერ-მინისტრმა, ჯუზეპე კონტემ განაცხადა.

ბოლო 24 საათის განმავლობაში, სამართალდამცველების მიერ განხორციელებული მონიტორინგის შედეგად, მთელი ქვეყნის მასშტაბით, საგანგებო მდგომარეობის რეჟიმის და ე.წ. კომენდანტის საათის შეზღუდვების დარღვევის 182 ახალი ფაქტი გამოვლინდა. ამის შესახებ „აფხაზეთის ხმას“ შსს-დან აცნობეს.