2020-04-21 12:11

ქუთაისის ინფექციურ საავადმყოფოში კორონავირუსით ინფიცირებული ახალგაზრდა მამაკაცი შეიყვანეს. პაციენტს თურქეთში მოგზაურობის ისტორია აქვს და ერთ - ერთ საკარანტინო სივრცეში იმყოფებოდა. როგორც ქუთაისის ინფექციური საავადმყოფოს ექიმი თემურ ნადირაძე აცხადებს, ახალი პაციენტის ჯანმრთელობის მდგომარეობა სტაბილურია.

რაც შეეხება დანარჩენ პაციენტებს, ნადირაძის ინფორმაციით, ამ დროისთვის ქუთაისის ინფექციურ საავადმყოფოში covid19-ით ინფიცირებული სულ 24 პაციენტია მოთავსებული, მათ შორის ოთხის ჯანმრთელობის მდგომარეობა საშუალო სიმძიმისაა. კლინიკაში ორი პაციენტის განმეორებითი კვლევის პასუხს ელოდებიან და უარყოფითი პასუხის შემთხვევაში, კლინიკიდან გაეწერებიან.

თემურ ნადირაძის ინფორმაციით, ქუთაისის ინფექციური საავადმყოფოში ამ დრომდე კორონავირუსისგან ხუთი პაციენტი გამოჯანმრთელდა.