ეკონომიკისა და მდგრადი განვითარების მინისტრის ნათია თურნავას განცხადებით, სილამაზის სალონებში, რომელიც 18 მაისიდან გაიხსნება, იქნება ელექტრონული რიგი, სოციალური დისტანცია და ნაკლები ადამიანი. ამის შესახებ თურნავამ მთავრობის ადმინისტრაციაში სხდომის დასრულების შემდეგ გამართულ ბრიფინგზე განაცხადა.
ჯანდაცვის სამინისტროს ინფორმაციით, ბავშვი, რომელიც ოჯახს ჩამოართვეს, ამჟამად იმყოფება სახელმწიფო მზრუნველობის ქვეშ და მის გაშვილებასთან დაკავშირებით გავრცელებული ინფორმაცია სიმართლეს არ შეესაბამება. როგორც უწყების მიერ გავრცელებულ განცხადებაშია ნათქვამი, სოციალური მუშაკების შეფასებით, გამოიკვეთა მშობლების მხრიდან არასათანადო მოპყრობის, ბავშვის უგულებელყოფის შემცველი ფაქტები და სხვა ის გარემოებები, რომლებზე დაყრდნობითაც სპეციალისტების მიერ მიღებული იქნა გადაწყვეტილება ბავშვის ოჯახიდან განცალკევების თაობაზე.
1 აშშ დოლარის ოფიციალური ღირებულება 3.2033 ლარი გახდა. ეროვნული ბანკის მიერ გამოქვეყნებული მონაცემების თანახმად, დღევანდელი ვაჭრობის შედეგად აშშ დოლარის ღირებულებამ 3.2033 ლარი შეადგინა. კურსი, რომელიც დღეს მოქმედებდა, 3.2037 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში 0.0004 შეადგინა.
„თავისუფალი დემოკრატების" ლიდერის, შალვა შავგულიძის განცხადებით, ხელისუფლებასა და ოპოზიციას შორის დადებული შეთანხმება საარჩევნო სისტების შეცვლას და პოლიტპატიმრების გათავისუფლებას ითვალისწნებდა, რისი გაგებაც „ქართულ ოცნებას“ არ სურს. შავგულიძის თქმით, შეთანხმების პირობები დაცული უნდა იყოს და არ შეიძლება ხელისუფლებას მიეცეს საშუალება, დღეს ერთი თქვას და ხვალ - მეორე.
არც იფიქროს ხელისუფლებამ, რომ მას ძველი საარჩევნო სისტემით ამ არჩევნების ჩატარება გაუვა, - ამის შესახებ „ერთიანი საქართველოს“ ლიდერმა ნინო ბურჯანაძემ ოპოზიციური პარტიების წარმომადგენლების შეხვედრის დაწყებამდე განაცხადა.
დამოუკიდებელი დეპუტატის ეკა ბესელიას განცხადებით, ოპოზიციამ მმართველ პარტიას არ უნდა მისცეს პირობის უკან წაღებისა და ამგვარად კონსტიტუციური კანონპროექტის ჩავარდნის შესაძლებლობა.
ვიდრე ამ ქვეყანას სათავეში მილიარდერი ივანიშვილი უდგას ყველაფრის საფრთხე არსებობს და ყველაფრის საფრთხე იარსებებს, დაწყებული საარჩევნო სისტემის, საკონსტიტუციო ცვლილების არმიღებით, დამთავრებული სახელმწიფოებრივი საფუძვლების ბოლომდე მორღვევით. ამის შესახებ „ერთიანი ნაციონალური მოძრაობის“ ერთ-ერთმა ლიდერმა ნიკა მელიამ ოპოზიციური პარტიების ლიდერების შეხვედრის დაწყებამდე ჟურნალისტებთან საუბრისას განაცხადა. მისი თქმით, წინ დიდი ბრძოლაა და ისინი იბრძოლებენ იმ გზით, რაც ამ სახელმწიფოს „განათებას მოემსახურება და არა წყვდიადში შესვლას“.
ტყუილით და მანიპულირებით „ქართულმა ოცნებამ“ საკუთარი თავი ჭაობში შეიყვანა და ყველა ნაბიჯით უფრო ღრმად იძირება მასში. ამიტომ გამოსავალი არის მხოლოდ ერთი - შეთანხმების შესრულება მის ორივე ნაწილში, - ამის შესახებ „ევროპული საქართველოს“ ლიდერმა დავით ბაქარაძემ ლეიბორისტული პარტიის ოფისში ოპოზიციური პარტიების შეხვედრის დაწყებამდე, ჟურნალისტებს განუცხადა. როგორც მან აღნიშნა, შეთანხმების შესრულება გულისხმობს, როგორც საარჩევნო, ასევე პოლიტიკური დევნის ნაწილში მის შესრულებას. როგორც ბაქრაძე ამბობს, სწორედ ასეთი მოლოდინი არსებობს უცხოელი პარტნიორების მხრიდანაც.
თბილისის მერის, კახა კალაძის განცხადებით, შეშელიძის ქუჩაზე არსებულ მეწყერსაშიშ ზონაზე მეწყერსაწინააღმდეგო დამჭერი კონსტრუქცია მოეწყობა. მისი თქმით, პროექტი ითვალისწინებს სადრენაჟე არხების მოწყობასაც.
ინფექციური საავადმყოფოს სამედიცინო დირექტორის, მარინა ეზუგბაიას განცხადებით, გუშინ მათ კლინიკაში ექვსი პირი გამოჯანმრთელდა და ყველა მათგანი მოზარდია.
