"არტურის ანაბეჭდები ეტყობა ამ ხელს?" - ასე უპასუხა საპარლამენტო უმრავლესობის წევრმა თამაზ მეჭიაურმა ჟურნალისტების შეკითხვაზე, მართალია თუ არა არტურ არუთინოვი, რომელიც ამტკიცებს, რომ დეპუტატმა მეჭიაურმა ხელი გაარტყა.
არტურ არუთინოვი იმ აქციის მონაწილეა, რომლის წევრები პარლამენტის ყოფილი შენობის წინ შეიკრიბნენ და "საგზაო მოძრაობის შესახებ" კანონში უმრავლესობის მიერ ინიცირებულ ცვლილებებს აპროტესტებდნენ.
არუთინოვის თქმით, ის უსტვენდა, რა დროსაც დეპუტატი მივიდა და ხელი დაარტყა. ამის დამადასტურებელი ვიდეო "ფეისბუქში" ნაციონალური მოძრაობის" ერთერთმა ლიდერმა ირმა ნადირაშვილმა გამოაქვეყნა. ვიდეოზე ნათლად ჩანს დეპუტატი, რომელმაც აქციის მონაწილეს სახეში მუშტი გაარტყა.
ინციდენტს მოწმეებიც ჰყავს. მაგალითად, აქციის მონაწილე დათო სიჭინავა "პალიტრასთან" საუბარში ამბობს, რომ მან დაინახა ჭაღარა, შრამიანი მამაკაცი, რომელიც უეცრად მივიდა აქციის მონაწილესთან და ხელი გაარტყა: "მე მასში დეპუტატი მეჭიაური ამოვიცანი და ვუთხარი კიდეც, არ გრცხვენია, დეპუტატი ხარ და მოქალაქეს ხელს როგორ ურტყამ-მეთქი და მან ძველბიჭურად მიპასუხა - მე დეპუტატი კი არა, კაცი ვარო, მერე კი უცებ გაიქცა".
