2013-11-12 18:03

რკინიგზელთა ახალი პროფკავშირის ლიდერი მთავრობას და საპარტნიორო ფონდს მოუწოდებს, რკინიგზელებსა და რკინიგზის ადმინისტრაციას შორის შუამავლის როლი შეასრულონ, რათა დაგეგმილი უვადო აქცია არ შედგეს.

ამის შესახებ რკინიგზელთა ახალი პროფკავშირის თავმჯდომარე ვიტალი გიორგაძე აცხადებს. მისი ინფორმაციით, რკინიგზის პროფკავშირებს ადმინისტრაციასთან დავა რამდენიმე საკითხთან დაკავშირებით აქვს; 

ეს არის ზეგანაკვეთური სამუშაოს ანაზღაურება, ასევე - პრემიალური სისტემის დანერგვა მე-13 ხელფასის სახით, თანრიგების კლასობრივად დაყოფა და სახელფასო დანამატი სტაჟის მიხედვით. 

„შარშან სწორედ ასეთ სიტუაციაში ეკონომიკის მინისტრი და საპარტნიორო ფონდის თავმჯდომარე ჩაერთვნენ საქმეში და მათი ჩართულობით მოხდა ის, რომ შეჩერდა გაფიცვა. 

იმავეს გაკეთება დღესაც შეიძლება, უბრალოდ ის პასუხიმსმგებლობა რასაც ჩვენ ვგრძნობთ, გვინდა, რომ იგივე პასუხიმსგებლობა იგრძნოს რკინიგზის ადმინისტრაციამაც, რომელიც გულგრილად და ნიშნის მოგებით ეკიდება ჩვენ განცხადებას“, - ამბობს ვიტალი გიორგაძე. 

მისივე თქმით, იმ შემთხვევაში, თუ მოლაპარაკებები არ შედგა, რკინიგზელების სრულმასშტაბიანი უვადო გაფიცვა 14 ნოემბერს 10:00 საათზე დაიწყება.