-
2013-11-10 12:17
განათლების მინისტრმა, თამარ სანიკიძემ ოლიმპიადის ტესტებთან დაკავშირებით შექმნილ სიტუაციაზე კომენტარი გააკეთა. მინისტრმა აღნიშნა, რომ უწყება შესაბამის გადაწყვეტილებებს მონიტორინგის ჯგუფის დასკვნის დადების შემდეგ მიიღებს:
„დაველოდები მონიტორინგის სამსახურის საბოლოო დასკვნას. ეს არის რამდენიმე ერთეული ადამიანის არაკეთილსინდისიერი ქმედება, რომელმაც გამოიწვია აჟიოტაჟი. ვფიქრობ, ზედმეტად დრამატიზირებულია ეს პრობლემა, რადგან როგორც ყველა კონკურსის პირობებში, მონიტორინგის ჯგუფი ყოველთვის აკონტროლებს მსგავს სიტუაციებს. არ ვფიქრობ, რომ ეს არის ისეთი მასშტაბური დარღვევა, რომელმაც პროცესი უნდა ჩაშალოს”,- განაცხადა თამარ სანიკიძემ.
შეგახსენებთ, რომ ინტერნეტსივრცეში გავრცელდა სასკოლო ოლიმპიადის ტესტები, რომლებიც ემთხვეოდა იმ ტესტებს, რაც მოსწავლეებს ოლიმპიადის პირველი ტურის ფარგლებში უნდა დაეწერათ. გავრცელებული ცნობით, ბავშვების გარკვეულმა რაოდენობამ ტესტების პასუხები წინასწარ იცოდა, რასაც მოსწავლეთა მეორე ნაწილისა და მათი მშობლების პროტესტი მოჰყვა. ოლიმპიადის პირველი ტურის დღეს მოსწავლეებმა დაადასტურეს, რომ წინასწარ გამოქვეყნებული ტესტები მართლაც იყო შეტანილი იმ საკითხებში, რაც მათ ოლიმპიადაზე შეხვდათ.