თენგიზ ცერცვაძე მოსახლეობას მიმართავს და აცხადებს, რომ - „ფაიზერი“ გაიხარჯება ძალიან ჩქარა, მერე მაინც „ასტრაზენეკა“ დარჩება და დანარჩენები უბრალოდ იძულებული იქნებიან, „ასტრაზენეკათი“ აიცრან, ან ჩინურით აიცრან ან დაელოდონ, ივნისში „ნოვოვაქსი“ შემოვა და იმით აიცრან.“
ამასთანავე, მან არ გამორიცხა, რომ ვაქცინაციასთან დაკავშირებით ასაკობრივმა ზღვარმა შესაძლოა დაიწიოს.
ჟურნალისტების კითხვაზე, ვაქცინაციაზე დაბალი მოთხოვნის ფონზე, ხომ არ იგეგმება, რომ კიდევ უფრო დაიწიოს ასაკობრივი კატეგორია და ყველას მიეცეს აცრის საშუალება, თენგიზ ცერცვაძემ უპასუხა, რომ თუ ასეთი პასიურობა შენარჩუნდება, შესაძლოა, ვაქცინაცია საყოველთაოც გახდეს.
„ორი საბჭოა - ერთი ვაქცინაციის უწყებათაშორისი და მეორე, იმუნიზაციის გვერდითი მოვლენების. მე არცერთი საბჭოს წევრი არ ვარ, მაგრამ რამდენადაც ინფორმაცია მაქვს, ეს გამორიცხული არ არის. შესაძლოა, რომ ასაკობრივმა ზღვარმა კიდევ დაიწიოს და საერთოდ, თუ ასეთი პასიურობა იქნება, შესაძლოა გახსნილი, საყოველთაო იყოს“, - განაცხადა ცერცვაძემ.
როგორც ცნობილია, საქართველოს ჯანდაცვის მინისტრის მოადგილის, თამარ გაბუნიას განცხადებით, 25 მარტიდან, როგორც მედიცინის მუშაკებს, ასევე, 65 წელს ზემოთ მოქალაქეებს, საშუალება ექნებათ არჩევანი „ასტრაზენეკასა“ და „ფაიზერს“ შორის გააკეთონ.
