მიკროავტობუსში კონდიცირების სისტემის ამოქმედებასთან არსებულ პრობლემასთან დაკავშირებით კომპანია “თბილისის მიკროავტობუსს” მერიის ახალ ხელმძღვანელობასთან კონსულტაციები ჰქონდა.
როგორც “თბილისის მიკროავტობუსის” გენერალურმა დირექტორმა დავით ასანიძემ განაცხადა, კომპანია კონდიცირების სისტემას ყველა მიკროავტობუსში საკუთარი სახსრებით არემონტებს, ამიტომ მისი გაფუჭების შემთხვევაში მძღოლებს პრობლემა არ შეექმნებათ.
მისივე თქმით, სანქციები მძღოლებს გასულ ზაფხულსაც დაუწესდათ, თუმცა მან შედეგი ვერ გამოიღო, ამიტომ ქალაქში იმოძრავებს მობილური ჯგუფები, რომლებიც მიკროავტობუსში კონდიცირების სისტემის მუშაობას დააკვირდებიან და იმ შემთხვევაში, თუ აღმოაჩენენ დარღვევას, მძღოლების მიმართ გამკაცრებული სანქციები ადგილზევე გატარდება.
„ამ დღეებში შევხვდით ქალაქის სატრანსპორტო სამსახურის ახალ ხელმძღვანელს, განვიხილეთ მიმდინარე პრობლემები. კონდიცირების თემა აქტუალური პრობლემაა და ამ საკითხთან დაკავშირებით შევთანხმდით, რომ გავატარებდით დამატებით ღონისძიებებს იმის საკონტროლოდ როგორ ირთვება ან არ ირთვება კონდიციონერები მიკროავტობუსში.
პრობლემა მდგომარეობდა შემდეგში, რომ როდესაც კონდიციონერი მუშაობს მანქანაში, ის დამატებით საწვავს ხარჯავს. რაც შეეხება მათ გამართულობას, 90%-ზე მეტი გამართულია. ასევე, მინდა ვთხოვო მოსახლეობას, რომ არსებობს ცხელი ხაზი და დარეკონ 2 200 340 თუკი იქნება შემთხვევა, როცა მძღოლი არ ჩართავს კონდიციონერს”,- განაცხადა ასანიძემ.