2016-10-07 07:24

რუსეთის საგარეო საქმეთა სამინისტრო საქართველოში მყოფ რუს ტურისტებს მოუწოდებს, 8 ოქტომბერს მოერიდონ მასობრივ პოლიტიკურ ღონისძიებებს. ამის შესახებ განცხადება სამინისტროს კრიზისის ცენტრმა გაავრცელა.

უწყება რუსეთის მოქალაქეების ამ გაფრთხილებას იმით ხსნის, რომ საქართველოში 8 ოქტომბერს საპარლამენტო არჩევნები ტარდება. 

მსგავსი განცხადება, ჯერჯერობით, არცერთი სხვა ქვეყნის საგარეო უწყებას არ გაუკეთებია. 

საქართველოში გაეროს მუდმივმა წარმომადგენელმა ნილს სკოტმა 6 ოქტომბერს განაცხადა, რომ წინასაარჩევნო სიტუაცია ქვეყანაში სამაგალითო იყო, თუმცა, ბოლო დღეებში გამწვავდა.

ამის მიზეზი 4 ოქტომბერს მომხდარი აფეთქება გახდა, რა დროსაც ერთიანი ნაციონალური მოძრაობის ერთერთი ლიდერის გივი თარგამაძის მანქანაში, სავარაუდოდ, მართვადი პულტით მოწყობილობა ააფეთქეს. შემთხვევა თბილისის ცენტრში, კოლმეურნეობის მოედანთან მოხდა და 5 ადამიანი დაშავდა.