უკრაინის დედაქალაქის ცენტრში ФСБ-ს შეიარაღებული ქილერი, მეტსახელად "ზონა" დააკავეს, რომელიც საქართველოს მოქალაქის პასპორტითა და ქართული სახელმწიფო ნომრების მქონე მანქანით გადაადგილდებოდა. ინფორმაციას "კავკაზ-ცენტრი" ავრცელებს.
"ზონას" თემურ მახაურის სახელზე გაცემული პირადობის დამადასტურებელი მოწმობები აღმოაჩნდა, ხოლო ჩხრეკისას "გლოკი" და "სტეჩკინი" უპოვეს. მახაური, იგივე "ზონა" "მერსედესით", სხვა პირებთან ერთად გადაადგილდებოდა.
"როცა საპატრულო პოლიციამ მანქანა გააჩერა და შიგ მყოფებმა დოკუმენტები წარმოადგინეს, აღმოჩნდა, რომ ერთი, უკრაინულად შევსებული დოკუმენტი თემურ მახაურის, იგივე "ზონას" სახელზე იყო გაცემული, რომელიც ატო-ს (ანტიტერორისტული ოპერაციის) ზონაში, მარიუპოლში ბაზირებულ ჩეჩნურ ბატალიონში, მზვერავად ირიცხება", - ნათქვამია განცხადებაში.
"ზონა", იგივე რუსლან პაპასქირი, იგივე თემურ მახაური, იგივე ჩეჩენი ალი დაბუევი 2012 წლის შემოდგომაზე, თურქეთში დააკავეს, კავკასიის საემიროს წარმომადგენლის მუსა ატაევის მკვლელობის ორგანიზების ბრალდებით.
პროცესის მსვლელობის დროს გაირკვა, რომ "ზონა" რუსეთის ФСБ-ზე, კილერის ფუნქციით მუშაობს. თურქული პრესა ასევე, წერდა, რომ "ზონა" მიხეილ სააკაშვილისდროინდელი საქართველოს სპეცსამსახურებთან დაკავშირებული პირია.
2012 წელს დაკავებული "ზონა" თურქეთის სასამართლომ 2015 წელს გაათავისუფლა. როგორც თურქული პრესა წერდა, მისი გათავისუფლების უკან ფეთჰულა გიულენის ჯგუფი იდგა. გათავისუფლების შემდეგ "ზონა" უკრაინაში გადაინაცვლა, სადაც ჩეჩნებით დაკომპლექტებულ ბატალიონში მზვერავად ჩაეწერა.
