რუსული ინტერნეტრესურსი „პრაიმკრაიმ.რუ“, რომელიც ანოტაციაში უთითებს, რომ „კანონიერი ქურდების შესახებ მთავარი“ საიტია, ავრცელებს ინფორმაციას, რომ იანვრის ბოლოს საქართველოს ახალმა ხელისუფლებამ „კანონიერი ქურდი“ ციხიდან გაათავისუფლა.
„29 იანვარს სასჯელაღსრულების მე–7 დაწესებულებიდან გამოვიდა „კანონიერი ქურდი“ სპარტაკ ჯაფარიძე, რომელსაც მკვლელობისთვის 18 წლით თავისუფლების აღკვეთა ჰქონდა მისჯილი. მან სასჯელის მესამედზე მეტი მოიხადა და საქართველოს ახალმა ხელისუფლებამ ვადაზე ადრე გაათავისუფლა“, – წერს „პრაიმკრაიმი“.
ამავე რესურსის ცნობით, სპარტაკ ჯაფარიძე იმავე დღეს გადაფრინდა ერევანში, მაგრამ სომხეთმა ის არ მიიღო და უკან, საქართველოში მიაბრუნა, რის შემდეგაც „კანონიერმა ქურდმა“ მეორე დღეს, უკვე სარფის საბაჟოს გავლით დატოვა ქვეყანა.
„პრაიმკრაიმი“ კიდევ ერთ „კანონიერ ქურდზე“ წერს, რომელსაც ყველა ბრალდება თბილისის საქალაქო სასამართლომ მოუხსნა: „40 წლის კახა ორაგველიძე 2012 წლის დეკემბერში ეტაპით ჩაიყვანეს რუსეთიდან, სადაც 10 წელი იჯდა ძარცვაში მონაწილეობისთვის. „კანონიერი ქურდი“ მკვლელობაშიც იყო ბრალდებული, მაგრამ 18 იანვარს ის გაამართლეს და სასამართლოს დარბაზიდან გაათავისუფლეს“.
ფოტო ("პრაიმკრაიმ.რუ"): მარცხნივ სპარტაკ ჯაფარიძე, მარჯვნივ ტარიელ ფოცხვერია
