-
2014-02-16 23:25
ხობთან გუშინ მომხდარი ავტოსაგზაო შემთხვევის დროს მანქანის საჭესთან მჯდარი, კოალიცია „ქართული ოცნების“ წევრის გიგა ბუკიას ძმა ავარიის შემდეგ შედგენილ ოქმებში აღარ ფიგურირებს.
ამის შესახებ „აფხაზეთის ხმას“ ხობიდან აცნობეს. თვითმხილველის ინფორმაციით, გიგა ბუკიას ძმამ, რომელიც საკუთარი, „ფორდის“ მარკის ავტომანქანის საჭესთან, სავარაუდოდ, ნასვამი იჯდა, სოფელ პირველი მაისის ტერიტორიაზე საჭე ვერ დაიმორჩილა და განათების რამდენიმე ბოძს შეეჯახა.
შემთხვევის ადგილი ხობის ცენტრიდან დაახლოებით ერთ კილომეტრში, ხობი–ზუგდიდის მიმართულებით მდებარეობს. ავარიის შემდეგ ადგილზე მისული საპატრულო პოლიციის ეკიპაჟის ოქმში გიგა ბუკიას ძმა აღარ ფიგურირებს. ოქმის მიხედვით, ავტომანქანას სხვა პიროვნება მართავდა.
„აფხაზეთის ხმის“ ინფორმაციით, პატრულის მოსვლამდე გიგა ბუკიას ძმამ, რომელიც სერიოზულად არ დაზიანებულა, მობილური ტელეფონიდან რამდენიმე ადგილას დარეკა, რის შემდეგაც შემთხვევის ადგილზე ბუკიების ახლობელი მივიდა და განაცხადა, რომ საჭესთან თვითონ იჯდა, რასაც თვითმხილველები კატეგორიულად უარყოფენ. ამასთან, თვითმხილველები ვერ აკონკრეტებენ, ოქმის გაყალბებაში საპატრულო პოლიციამ მონაწილეობა მიიღო, თუ ისინი შეცდომაში შეიყვანეს.
„აფხაზეთის ხმამ“ ჯერჯერობით ვერ შეძლო შსს–ს პრესსამსახურთან დაკავშირება – უწყების კომენტარს მისი მოპოვებისთანავე შემოგთავაზებთ.
აღსანიშნავია, რომ ამ ინფორმაციის დადასტურება სისხლის სამართლებრივ პასუხისმგებლობას ითვალისწინებს როგორც საჭესთან მჯდომი პირის, ასევე ცრუ განმარტების მიმცემი პირის მიმართ, რომელმაც განაცხადა, რომ შეჯახებამდე ავტომანქანას მართავდა.