2014-02-11 22:55

საქართველოს პრემიერმინისტრი ირაკლი ღარიბაშვილი აცხადებს, რომ გეგუთის „მცირე ინციდენტი“ არ უნდა მომხდარიყო, რადგან პატიმრებისთვის არ არსებობს მიზეზები, რის გამოც შეიძლება მათ თვითდაზიანება მიიყენონ.

პრემიერმინისტრი ასევე აცხადებს იმ ვარაუდის შესახებ, რომ გეგუთის პროცესები გარედანაც არის მხარდაჭერილი: "მქონდა საუბარი შინაგან საქმეთა მისინსტრთან, რომლისგანაც მივიღე ინფორმაცია, რომ სამწუხაროდ გარედანაც არის მსგავსი პროვოკაციები მხარდაჭერილი სხვადასხვა ინდივიდების, ოდიოზური პიროვნებების მიერ, ეს უნდა იქნას გამოძიებული და ყველა მსგავის პიროვნება პასუხისგებაში იქნეს მიცემული.

უპრეცენდენტო ამნისტის შედეგად, ჩვენ 15 ათასამდე პატიმარი გავათავისუფლეთ, ვინც დარჩა, მათ სასჯელი უნდა მოიხადონ. როგორც მინიმუმ, ეს არის ძალიან დიდი უმადურობა ამ პატიმრების მხრიდან გამოხატული ხელისუფლების მიმართ, რადგან ჩევნი მოსვლით წერტილი დაესვა იმ უსამართლობას რაც ციხეებში არსებობდა", – ამბობს მთავრობის მეთაური.

ირაკლი ღარიბაშვილის განცხადებით, სოზარ სუბარის პირობებში ციხეში ვითარება კარდინალურად შეიცვალა: „მან პატიმრებს ჯოჯოხეთი სამოთხედ უქცია“, – განაცხადა პრემიერმინისტრმა.

პრემიერმინისტრმა გეგუთის ინციდენტის მონაწილეებსაც მიმართა:

„მინდა მივმართო მათ: არსებობს წესი და არსებობს კანონი. კეთილი ინებონ და დაექვემდებაროს ყველა ამ კანონს. ჩვენ ვართ სახელმწიფო და სახელმწიფო ვერ იცხოვრებს, ვერ იმოქმედებს რომელიმე პატიმრის რადიკალური გამოხტომების მიხედვით. მე მესმის მათი განწყობა, რომ უნდათ, მალე გავიდეს დრო, მაგრამ ადამიანმა დანაშაული არ უნდა ჩაიდინოს და თუ ჩაიდენს, მან სასჯელი უნდა მოიხადოს საპატიმროში...“, – თქვა ირაკლი ღარიბაშვილმა.