რუსეთი უკრაინიდან მიმავალ პროდუქციით დატვირთულ ავტომობილებს საბაჟოებზე პრობლემებს უქმნის. აღნიშნულის შესახებ უკრაინული მედია იუწყება.
სატვირთო ავტომობილის მძღოლებს უცხადებენ, რომ ტვირთის განბაჟებამ შესაძლოა 10-დან 15 დღემდე წაიღოს.
საერთაშორისო საავტომობილო გადაზიდვის ასოციაციაში აცხადებენ, რომ რუსეთის ფედერაციამ კვლავ განაახლა საბაჟო ბლოკადა უკრაინიდან შესულ ტვირთზე. მსგავსმა პრობლემამ გასული წლის აგვისტოშიც იჩინა თავი.
ასოციაციის მიერ გავრცელებულ განცხადებაში ნათქვამია, რომ რუსეთი 28 იანვრიდან კვლავ გზავნის სხვადასხვა პროდუქციით დატვირთულ ავტომობილებს დროებით შემნახველ პუნქტებში. აღნიშნულის მიზეზად კი სრულყოფილი შემოწმება სახელდება.
შემოწმების შედეგად ხელმოწერილი დოკუმენტები, რომლებიც ტვირთის აღწერილობას შეიცავს, მოსკოვში დასამტკიცებლად იგზავნება. აღნიშნული კი საკმაოდ დიდ დროს მოითხოვს. ხშირ შემთხვევაში ავტომობილები მალფუჭებადი პროდუქციით არის დატვირთული.
სატვირთო ავტომობილების მძღოლები საკუთარ დამქირავებლებსა და ხელისუფლებას დახმარებას სთხოვენ.
