-
2014-01-16 18:05
სურსათის ეროვნული სააგენტო კუმისის არალეგალურ სასაკლაოზე დაკლული ვირების ფოტოებს „ფეისბუქის“ გვერდზე აქვეყნებს.
სააგენტო წერს, რომ ამ საკითხთან დაკავშირებით მოკვლევა გრძელდება.
შეგახსენებთ, რომ კუმისში აღმოჩენილ არალეგალურ სასაკლაოზე, სადაც დაკლული ვირების ხორცით, სავარაუდოდ, თბილისის საშაურმეებს ამარაგებენ, სიუჟეტი 15 იანვარს „კურიერმაც“ მოამზადა.
სურსათის ეროვნული სააგენტოს გვერდზე „ფეისბუქში“ ნათქვამია, რომ სააგენტო აგრძელებს ღონისძიებების გატარებას. აქვე აღნიშნულია, რომ სპეციალისტებმა ადგილზე დაათვალიერეს ე. წ. ჭალას ტერიტორია, რომელიც, მათი განმარტებით, ნაგავსაყრელს უფრო ჰგავს, ვიდრე სასაკლაოს.
ღია ცის ქვეშ მიმოფანტულია დაკლული ცხოველების, მათ შორის ვირის და ცხენის ჩონჩხები. სააგენტომ აღნიშნული ფაქტი შემდგომი კვლევისთვის უკვე აცნობა სამართალდამცავ ორგანოებს.
პარალელურად, სარეალიზაციო ობიექტებში გაძლიერებულია კონტროლი. ერთ-ერთი ვერსიით, დაკლული ცხოველების ხორცი შესაძლოა, თბილისის საშაურმეებსა და რესტორნებში მოხვედრილიყო.
ამიტომ თბილისის სამმართველოს სპეციალისტები დედაქალაქის მასშტაბით პერმანენტულ რეიდებს ახორციელებენ. შემოწმდება ყველა ის ობიექტი, სადაც ასეთი პროდუქტის მოხვედრის ალბათობაა“, - აღნიშნულია „ფეისბუქში“.