წუხანდელმა ღამემ კიევში დაანონსებული დარბევის გარეშე ჩაიარა. ევრომაიდანზე მთელი ღამის განმავლობაში რჩებოდა დაახლოებით 500 დემონსტრანტი.
სპეცრაზმმა სამთავრობო კვარტალში ყველა დაწესებულება მოპიკეტეებისგან გაათავისუფლა, თუმცა, ამ პროცესს შეტაკება არ მოჰყოლია – დემონსტრანტები შენობებს განსაკუთრებული წინააღმდეგობის გარეშე ტოვებდნენ.
ამ დროისთვის არსებული ინფორმაციით, მოპიკეტეებისგან თავისუფალია კიევის მერიის შენობა, აღებულია ყველა ბარიკადა. დემონსტრანტებთან მთელი ღამის განმავლობაში იმყოფებოდნენ ასევე ოპოზიციის ლიდერები. მათ ბრიფინგიც ჩაატარეს და განაცხადეს, რომ თუ ხელისუფლება ძალას გამოიყენებს, ეს ძალადობრივი სახელმწიფოს შექმნის მცდელობა იქნება, რისი წინაპირობაც არ არსებობს.
ევრომაიდანზე მივიდა „რეგიონების“ პარტიის წევრი იაკოვლევი, რომელიც დემონსტრანტებს გაესაუბრა: „იმედია, ძალის გამოყენება არ მოხდება, თუმცა, ყველა საკითხი ჩემს კომპეტენციაში არ შედის“, – განაცხადა დეპუტატმა.
აქციის მონაწილეებს შეხვდნენ ასევე ვიტალი და ვლადიმირ კლიჩკოები, რომლებმაც დემონსტრანტებს უთხრეს, რომ უსაფრთხოების გარანტიას ვერ მისცემენ, რადგან არაა გამორიცხული, ხელისუფლებამ ძალა გამოიყენოს.
პარალელურად, აშშ–ის საელჩო უკრაინაში მოქალაქეებს მოუწოდებს, თავი შეიკავონ იმ ადგილებზე მისვლისგან, სადაც თავმოყრილი არიან მომიტინგეები და სამართალდამცველები.
