2014-07-21 20:44

რამაზ წიქორიძე, იგივე „რამაზ ბაგდატსკი“, რომელსაც „რამაზ კუტაისსკისაც“ უწოდებენ, სამართალდამცველებმა კიევში აიყვანეს - მას ბრალად კრიმინალური ჯგუფების კონტროლი ედება.

ამჟამად განიხილება საქართველოში მისი გამოძევების საკითხი. აღსანიშნავია, რომ რამაზ წიქორიძე - 42 წლის ე.წ. კანონიერი ქურდი 2013 წელს უკრაინელმა სამართალდამცველებმა ერთხელ უკვე გამოაძევეს საქართველოში, ის კიევი-თბილისის ავიარეისში ჩასვეს და თვითმფრინავის აფრენას დაელოდნენ, ხოლო ქართველ სამართალდამცველებს აცნობეს რეისი, რომლითაც კრიმინალური ავტორიტეტი მგზავრობდა.

ამის მიუხედავადა, როგორც ეკა კვესიტაძის საავტორო გადაცემიდან გაირკვა, რამაზ წიქორიძის მიერ საქართველოს სახელმწიფო საზღვრის გადმოკვეთის ფაქტი არ დაფიქსირებულა, ანუ, ოფიციალური დოკუმენტაციის მიხედვით, წიქორიძე თბილისში არ შემოსულა.

შესაბამისად, გაუგებარია, როგორ მოხვდა კიევში კიევი-თბილისის რეისზე იძულებით აყვანილი „კანონიერი ქურდი“ ისევ უკრაინის დედაქალაქში დაახლოებით წლინახევრის შემდეგ.