,,არ გამოვრიცხავ, რომ უახლოეს ხანში კიდევ ერთი საზარელი ოჯახური კატასტროფის მომსწრენი გავხდეთ,“ – MediaCity - თან საუბარში “ძალადობისგან დაცვის ეროვნული ქსელის“ იურისტი მანანა ფურცხვანიძე სკანდალურ განცხადებას აკეთებს.
,,შემაკავებელი ორდერის გამოწერა პატრულის პრეროგატივაა და იყო დრო, რომ აქტიურად წერდნენ. ახლა საერთოდ აიღეს ხელი და ოჯახური ძალადობის შემთხვევაში ან პირდაპირ სისხლის სამართლებრივ დევნას იწყებენ ან საერთოდ რეაგირების გარეშე ტოვებენ. ათასში ერთხელ არის სათანადო და შესაბამისი რეაქცია პოლიციის მხრიდან. ზუსტად ახლა მაქვს შემთხვევა, სადაც პოლიციის უმოქმედობის მაგალითი სახეზეა.”- ამბობს ფურცხვანიძე.
მისი თქმით, კიდევ ერთ ქალბატონს მეუღლე ემუქრება, ქალი საქართველოს მოქალაქე არ არის. ის შვილთან ერთად იმალება ახლობლებთან.
,,საუბარია ბალტიისპირეთის ერთ-ერთი ქვეყნის მოქალაქეზე, რომელიც საქართველოშია გათხოვილი და შვილიც ჰყავს. ეს ქალბატონი ყოფილი მეუღლის მხრიდან დევნას განიცდის და იძულებულია, რომ შვილთან ერთად ხან ერთ, ხან მეორე ახლობელთან დაიმალოს.
მეუღლეს ემალება, იმიტომ რომ იმას ცეცხლსასროლი იარაღი აქვს და ემუქრება. ეს ქალი სამშობლოში წასლასაც ვერ ახერხებს, იმიტომ, რომ ყოფილი ქმარი ბავშვის ქვეყნიდან გაყვანის უფლებას არ აძლევს.
ყოფილმა ქმარმა ცეცხლსასროლი იარაღით შეიძლება ყოველ წუთს, ახალი უბედურება დაატრიალოს. ასეთ სიტუაციაში პოლიცია სასამართლოში დოკუმენტების დროულად გადაგზავნას აჭიანურებს, რომ შემაკავებელი ორდერის გამოწერა მოხდეს. არ გამოვრიცხავ, რომ ეს ისტორიაც იგივე ფატალური შედეგებით არ დასრულდება და უახლოეს ხანებში კიდევ ერთი ოჯახური ძალადობის ან მკვლელობის მოსწრენი არ გავხდებით,“– ამბობს ფურცხვანიძე.
