2015-01-05 01:56

„პირველი არხის“ ეთერში, ოლგა ბაბლუანის საავტორო გადაცემაში :“მშვიდობით, იარაღო!“ საქართველოს კათოლიკოს-პატრიარქმა ილია მეორემ აღნიშნა, რომ საქართველოს აქვს აშშ-სა და სხვა დემოკრატიული ქვეყნების მხარდაჭერა, მაგრამ რუსეთი მაინც თავისას აკეთებს, ამიტომ, მათთან ერთად, რუსეთთან მოლაპარაკებები უნდა დაიწყოს.

პატრიარქი მიიჩნევს, რომ ხელისუფლებამ უნდა გაანალიზოს გზები, როგორ დაიბრუნოს ტერიტორიები, ამისთვის რუსეთის დარწმუნებაა საჭირო იმაში, რომ სეპარატიზმის მხარდაჭერა მასვე შეუბრუნდება ცუდად:

„ რუსეთი დიდი ქვეყანაა და დიდი ქვეყანა მუდამ ცდილობს კიდევ უფრო მოემატოს ტერიტორიები. ზოგიერთი ქვეყანა დაავადებულია ასეთი სენით, ტერიტორიის სენით და უნდა რომ მიუმატოს, მიუხედავად იმისა, რომ ვერ უვლის იმ არსებულსაც და მაინც ცდილობს დაიკავოს სხვისი ტერიტორია.

ევროპის ქვეყნები, დემოკრატიული ქვეყნები და ამერიკის შეერთებული შტატები 20 წელია გვეუბნებიან, რომ ისინი მხარს გვიჭერენ, მაგრამ რუსეთი მაინც თავისას აკეთებს. ამიტომ ჩვენ, მათთან ერთად, უნდა დავიწყოთ მოლაპარაკება რუსეთთან. ჩვენ უნდა დავარწმუნოთ, რომ ის პოლიტიკა, რასაც რუსეთი აწარმოებს, უარყოფითად მიუბრუნდება თვითონ რუსეთს.

მე არაერთხელ მითქვამს, რომ სეპარატიზმი არის გადამდები სენი და ისევ რუსეთს მიუბრუნდება ეს. ასე რომ, ხელისუფლებამ უნდა გააანალიზოს მდგომარება და უნდა გამოვნახოთ გზები, რომ დავიბრუნოთ აფხაზეთი და სამაჩაბლო. ხანდახან ზოგიერთი ამბობს, რომ ჩვენ დავკარგეთ აფხაზეთი და ცხინვალი. ჩვენ არ დაგვიკარგავს, ჩვენ დროებით ვერ ვაკონტროლებს ამას და ისევ ჩვენთან დაბრუნდება“, - განაცხადა პატრიარქმა გადაცემაში „მშვიდობით, იარაღო!“.