2016-05-21 11:37

„ერთიანი ნაციონალური მოძრაობის“ ახალი სახე, GRASS-ის (საქართველოს რეფორმების ასოციაცია) დამფუძნებელი და ყოფილი დირექტორი სერგი კაპანაძე საქართველოს ხელისუფლების წარმომადგენელთა მიდგომას ხურჩაში მომხდარ ტრაგედიასთან მიმართებაში მკაცრად აკრიტიკებს. 

სერგი კაპანაძე ჩამონათვალს აქვეყნებს, რა ნაბიჯები არ უნდა გადაედგა (ან გადაედგა) ხელისუფლებას, რომ ტრაგედია არ მომხდარიყო.

შეგახსენებთ, ხურჩაში, ქართული მხარის მიერ კონტროლირებად ტერიტორიაზე გალის რაიონის სოფელ ნაბაკევიდან გადმოსულმა საოკუპაციო რეჟიმის შეიარაღებულმა წარმომადგენლებმა 33 წლის გიგა ოთხოზორია მოკლეს. მკვლელობა სათვალთვალო კამერებმა აღბეჭდა. სოციალურ ქსელებში მოგვიანებით გავრცელდა ინფორმაცია, რომ სავარაუდო მკვლელი იდენტიფიცირებულია.

"ყველაზე უფრო მაბრაზებს, როდესაც ხელისუფლებაში მყოფებისგან ისმის - "აბა რა უნდა გაგვეკეთებინა, ომს ხომ არ დავიწყებთო?". ეს არის უპასუხისმგებლობის ზენიტი", - ამის შესახებ "ნაციონალური მოძრაობის" საპარლამენტო სიის ათეულის ერთერთი წევრი სერგი კაპანაძე სოციალურ ქსელში წერს. 

"რა უნდა გაგეკეთებინათ და: 

- თავის დროზე არ უნდა მიგეცათ დავალება უსაფრთხოების სამსახურებისთვის, რომ საოკუპაციო ზოლთან აქტიურები არ ყოფილიყვნენ

- არ უნდა გადმოგეწიათ ბლოკპოსტები უკან

- უნდა გეჩვენებინათ სხვადასხვა აქტივობებით, მათ შორის, ფარული აქტივობებით რუსებისთვის, რომ აქეთა მხარეს "პატრონი ჰყავს"

- არ უნდა გაგეშვათ რუსი ჯაშუშები თავის დროზე

- ბოლომდე უნდა მიგეყვანათ ტერორისტი ბორისოვის საქმე

- ყველა ბორდერიზაციის ეპიზოდზე უნდა აგეტეხათ დიდი ამბავი და სადაც შესაძლებელი იყო მავთულხლართის გადმოწევა შეგეჩერებინათ, თუნდაც ღამე სპეც. სამსახურების მიერ მისი დემონტაჟით

- აქამდე უნდა აღგედგინათ იპრმ-ის შეხვედრები

- და ბოლოს: არ მოგეშალათ და გაგენადგურებინათ ჩვენი სპეც. სამსახურების ის დანაყოფები, რომლებიც ოკუპირებული ტერუტორიების მიმართულებით მუშაობდნენ. და არ მივიღებ იმ არგუმენტს, რომ ადამიანის უფლებებს არღვევდნენ. ვინც არღვევდა, გაგესამართლებინათ კონკრეტული საქმეების გამო, ხოლო მიმართულება დაგეტოვებინათ.

აი ეს რომ გაგეკეთებინათ ომი ნაღდად არ დაიწყებოდა, ხოლო ამხელა ტრაგედია შეიძლება არ დატრიალებულიყო ხურჩაში. თავს მაინც ნუღა იმართლებთ! სამარცხვინოები..."- წერს სერგი კაპანაძე.