2016-06-24 22:01

"ამბრელას" დამფუძნებელი ლუკა ფეიქრიშვილი, რომლის სახლში რამდენიმე დღის წინ ჩხრეკა ჩაატარეს და პირადი კომპიუტერი და რამდენიმე მეხსიერების ბარათი წაიღეს, პროკურატურის წინ შიმშილობის დაწყებას არ გამორიცხავს. ამის შესახებ ფეიქრიშვილი საგანგებო განცხადებას ავრცელებს. 

"საგანგებო განცხადება მინდა გავაკეთო... მოგეხსენებათ, მხეცურად წაიღეს ჩემი კუთვნილი ტექნიკა ექსპერტიზაზე... ტექნიკური თვალსაზრისით, ერთი მეხსიერების ბარათის რამდენიმე დისკის და ერთი კეისის შემოწმებას ამხელა დრო არ უნდა...

აქედან გამომდინარე, ვფიქრობ, რომ პროკურატურა განგებ წელავს ექსპერტიზის დასკვნის პასუხის დადებას... ასევე ვფიქრობ, რომ მათი მთავარი მიზანია ხელი შემიშალონ ნაციონალური მოძრაობის ან სხვა პარტიის წინა საარჩევნო პიარ კამპანიის გაკეთებაში...

ჩემი კომპიუტერის წაღებამ ასევე მომაყენა ფინანსური ზარალი... ასევე მიმდინარეობს ზეწოლა ჩემის ოჯახის წევრებზე, რაც გამოიხატება იმაში, რომ პროკურატურამ ასევე წაიღო ჩემი ოჯახის წევრის კომპიუტერი ჩემთვის გაურკვეველი მიზეზით...

ამავდროულად დღეს საკუთარ უბანში როდესაც ვმოძრაობდი, მაღაზიის მიმართულებით, ჩემს წინ გაჩერდა ჩემთვის უცნობი უნომრო ავტომობილი, რომლიდანაც გადმოვიდა სამი პიროვნება. რა დროსაც ამოვიღე ჯიბიდან ტელეფონი ვიდეოს გადაღების მიზნით და სწორედ ამ დროს მომაძახეს ეს სიტყვები "რეალურ ცხოვრებაში ვერ დაგიცავენ პროგრამები" ამის შემდეგ ჩაჯდნენ ლურჯი ფერის უნომრო ფორდის ტიპის მანქანაში და სწრაფად დატოვეს ტერიტორია... 

მინდა მივმართო პროკურატურას: ასე მარტივად ვერ შემაშინებთ... ვგეგმავ დავიწყო საპროტესტო აქციები და უკიდურეს შემთხვევაში შიმშილობა პროკურატურის წინ...", - წერს ლუკა ფეიქრიშვილი.