უფრო ადრე პრემიერმინისტრ ღარიბაშვილის, ამ ბოლო დროს საქართველოს მთავრობის სხვა წევრების განცხადებების მიხედვით, რუსეთის ფედერაციაში ამ დროისთვის "ასეულობით ათასი ქართველი ცხოვრობს". პრემიერი 2013 წლის ბოლოს აცხადებდა, რომ ქართველთა რიცხვი რუსეთში მილიონზე მეტია.
ეს საკითხი ისევ აქტუალური გახდა რუსეთის მხრიდან საქართველოსთან სავიჟო რეჟიმის ლიბერალიზაციაზე საუბრის დაწყების პარალელურად, რისი ინიციატივაც რუსეთის საგარეო უწყების ხელმზღვანელის მოადგილე გრიგორი კარასინს ეკუთვნის.
2014 წლის თებერვალში რუსეტში მცხოვრები ქართველების რაოდენობის გარკვევა, სხვადასხვა წყაროებზე დაყრდნობით, "ფაქტ-მეტრმა" სცადა და დაასკვნა, რომ პრემიერის განცხადება იმის თაობაზე, თითქოსდა რუსეთში მილიონზე მეტი ქართველი ცხოვრობს, მეტწილად მცდარია, რადგან ის ეფუძნება გავრცელებულ შეხედულებას, ვარაუდს და მის უკან არ დგას არცერთი აღწერის ან კვლევის შედეგი. ამასთან, "ფაქტ-მეტრი" აზუსტებდა, რომ საკითხი უფრო მეტად გაირკვეოდა 2014 წლის აღწერის შედეგების შემდეგ, რომელიც 2014 წლის შემოდგომაზე იგეგმებოდა.
მოსაზრებები, მონაცემები და კვლევები, რომლებსაც "ფაქტ-მეტრი" ემყარებოდა, როცა პრემიერ ღარიბაშვილის განცხადებას "მეტწილად მცდარი" უწოდა, საბოლოო ჯამში, ასე გამოიყურება:
1989 წლის საბჭოთა კავშირის მოსახლეობის აღწერის შედეგების მიხედვით, რუსეთის საბჭოთა ფედერაციულ სოციალისტურ რესპუბლიკაში იმ პერიოდში 130 688 ქართველი ცხოვრობდა.
1990-2009 წწ. პერიოდში საქართველოს მოსახლეობა 1,11 მილიონით ემიგრაციის ხარჯზე შემცირდა.
საინტერესოა, აღნიშნული 1,11 მილიონი ემიგრანტიდან, რა რაოდენობა იყო ეთნიკურად ქართველი და რა რაოდენობა გადასახლდა მათგან რუსეთის ფედერაციაში.
იმავე კვლევის (საქართველოს საბუნებისმეტყველო აკადემიის აკადემიკოსის, პროფესორ ალექსანდრე თვალჭრელიძის და საქართველოს მეცნიერებათა ეროვნული აკადემიის წევრ-კორესპონდენტების მიერ საქართველოს სოციალურ-ეკონომიკური განვითარების პროგრამა) თანახმად, 1989 წლიდან 2002 წლამდე, საქართველოში ქართველთა ხვედრითი წილი 68,8%-იდან 83,8%-მდე გაიზარდა.
ეს კი იმას ნიშნავს, რომ მიგრაცია ძირითადად ეროვნულ უმცირესობებს შეეხო, თუმცა, ქართველთა აბსოლუტური რაოდენობა, 1989 წელთან შედარებით, ასევე შემცირდა 3787,4 ათასიდან 3661,2 ათასამდე, ანუ 126,2 ათასი ადამიანით.
126,2 ათასი ქართველი ემიგრანტი მთლიანადაც რომ მივუმატოთ 1989 წლისთვის რუსეთში მაცხოვრებელ ქართველთა მაჩვენებელს, 256,8 ათასს მივიღებთ. თუმცა, ბუნებრივია, რომ მოქალაქეთა ეს რიცხვი მთლიანად რუსეთის ფედერაციაში არ წასულა.
