ფინანსთა მინისტრი ნოდარ ხადური "აიპრესთან" საუბრისას, პენსიის მატებასთან დაკავშირებით "ათლარიან მატებას" აპროტესტებს და ამბობს, რომ პენსია 50 ლარით გაიზარდა.
"რატომ ათ ლარიანი და რატო არა ორმოცდაათ ლარიანი? ჩვენ 110 ლარი ჩავიბარეთ პენსია და დღეს 160 ლარია. ჩვენ აღვუდგინეთ რეგრესის პენსიები მოქალაქეებს. აი მაგალითისათვის, ეს არიან მეშახტეები, რუსთავის მეტალურგიული ქარხნის თანამშრომლები, რომლებიც დაშავდნენ, მათ წინა ხელისუფლებამ პენსიის მიცემა საერთოდ შეუწყვიტა, ჩვენ ეს აღვუდგინეთ; შეზღუდული შესაძებლობის მქონე პირებს, ბავშვებს გავუზარდეთ პენსია და გავუთანაბრეთ მკვეთრად გამოხატული შეზღუდული შესაძებლობების მქონე პირებს, ძველებურად პირველი ჯგუფის ინვალიდებს რომ ვეძახდით.
ამიტომ ბევრი მიმართულებით მივდივართ. ვიცი, რომ ეს საკმარისი არ არის და ამის შეხსენება არავისგან მჭირდება, რადგან ყოველდღიურ გარემოში მიწევს ამ ადამიანებთან ურთიერთობა, მათთან ერთად ცხოვრება და ბევრ რამეს ვხედავ, ვიცი, მაგრამ არის თემები, რომლებზეც, სამწუხაროდ, ყოველთვის ყველაფერი არ გამოდის.
მე ერთ მარტივ რამეს გეტყვით, ეკონომიკური ზრდა, რომელიც არის წარმატების ერთ-ერთი ინდიკატორი, ჩვენ გვაქვს უფრო მაღალი, ვიდრე ნებისმიერ სხვა სახელმწიფოს რეგიონში, მიუხედავად იმისა, რომ არც ჩვენი არ არის ისეთი, როგორიც გვსურს...
- რა პარამეტრებს გულისხმობთ, რითი გვაქვს უკეთესი?
- დაახლოებით 2,5-3 პროცენტია ეკონომიკური ზრდა საქართველოში, რუსეთს და უკრაინას არ შევადარებ იქ მინუსებია, იგივე მეზობელ სახელმწიფოებში, მაგალითად აზერბაიჯანში ჩვენზე დაბალია ეკონომიკური ზრდის მაჩვენებელი.
