საპატრიარქოს მიერ გავრცელებული განცხადების თანახმად, რომელიც ზუგდიდში ადგილობრივ მრევლს ზუგდიდისა და ცაიშის ეპარქიის მღვდელმთავარმა, ეპისკოპოსმა გერასიმემ გააცნო, ღვთისმშობლის კვართი ზუგდიდში დარჩება და მას ხობში არ გადაიტანენ.
კვართის გადატანა 21 სექტემბერს, ხობის დედათა მონასტერში, ერთი დღით იგეგმებოდა, თუმცა მას შემდეგ, რაც ამ ინიციატივას მღელვარება მოჰყვა, საპატრიარქომ სიწმინდის ზუგდიდში დატოვების გადაწყვეტილება მიიღო: ყოვლადწმინდა ღვთისმშობლის შესამოსელი ზუგდიდის დადიანების სასახლეთა ისტორიულ-არქიტექტურულ მუზეუმში დარჩება.
„ზუგდიდიდან ღვთისშობლის კვართის გადაბრძანებასთან დაკავშირებით საზოგადოებაში ბუნდოვანი სიტუაცია შეიქმნა მას შემდეგ, რაც ხობის ადგილობრივი ხელისუფლებისა და ინტელიგენციის წარმომადგენლები შეხვდნენ მის უწმინდესობას ყაზბეგში და გაავრცელეს ინფორმაცია, რომ კათოლიკოს-პატრიარქი თანახმა იყო, ეს სიწმინდე ერთი დღით დაბრძანებულიყო ხობის მონასტერში;
მაგრამ არ ითქვა იმ პირობის შესახებ, რომ პროცესს არ უნდა მოჰყოლოდა შფოთი და დაპირისპირება. მათი ნათქვამის მიხედვით, იქმნებოდა შთაბეჭდილება იმისა, რომ ეს თემა ყველა დონეზე იყო შეთანხმებული და პრობლემები არ შეიქმნებოდა, მაგრამ დღეს ზუგდიდში განვითარებულმა მოვლენებმა საპირისპირო სურათი წარმოაჩინა.
ბუნებრივია, მისი უწმინდესობაც და, ზოგადად, ეკლესიაც ასეთ ვითარებაში მხარს ვერ დაუჭერს ღვთისმშობლის კვართის გადაბრძანებას, რაც საქართველოს საპატრიარქოს 14 სექტემბრის განცხადებაშიც გარკვევით იყო დაფიქსირებული. შევნიშნავთ იმასაც, რომ, რადგან ეს სიწმინდე დაცულია მუზეუმში, სახელმწიფოს მიერ და ეკლესია მასზე პატრონაჟს ვერ ანხორციელებს, თავისი პოზიცია უნდა დააფიქსიროს ხელისუფლებამაც, მითუმეტეს, რომ თავიდან თანხმობა მათი მხრიდან იქნა გაცემული“ - აღნიშნულია საპატრიარქოს მიერ ცოტა ხნის წინ გავრცელებულ განცხადებაში.
