სოფლის მეურნეობის მინისტრის მოადგილე ლევან დავითაშვილი აცხადებს, რომ კახელმა გლეხებმა რეალობა კარგად იციან, მაგრამ სიტუაციას „ნაციონალური მოძრაობის“ ის აქტივისტები ამწვავებენ, რომლებიც თავად უშლიდნენ ღვინის ქარხნებს ყურძნის ჩაბარებას.
12-საათიან „კურიერში“ პირდაპირი ჩართვის დროს ლევან დავითაშვილმა განაცხადა, რომ რთველი ჯერ არ გახურებულა და დროთა განმავლობაში ფასები ყურძენზე მოიმატებს, რადგან „ყოველთვის ასე ხდება“. მინისტრის მოადგილემ „უსაფუძვლო“ უწოდა გავრცელებულ ინფორმაციას იმის შესახებ, რომ ქარხნები ყურძნებს მხოლოდ 5 თეთრად და მხოლოდ დასეტყვილს იბარებენ და აღნიშნა, რომ საფერავზე ფასი 70 თეთრზე ნაკლები არ არის, ხოლო რქაწითელის ფასი 85 თეთრია და მათ ყველა ქარხანაში იბარებენ.
ამავე დროს, გლეხების თქმით, ქარხნები მხოლოდ დასეტყვილ ყურძენს და მხოლოდ 5 თეთრად იბარებენ, გლეხებს კი ეუბნებიან, რომ სხვა სახის ყურძნის ჩასაბარებლად ჭურჭელი არა აქვთ. მათ დღეს აქციის გამართვა სცადეს, თუმცა, პოლიციამ გზის გადაკეტვის საშუალება არ მისცა. გლეხები ისევ სოფლის მეურნეობის მინისტრთან შეხვედრას ითხოვენ, ხოლო მინისტრის მოადგილე აცხადებს, რომ მათ კომუნიკაციის პრობლემა არა აქვთ, თუმცა, მხოლოდ ისეთ ფორმატში შეხვდებიან მევენახეებს, სადაც დიალოგი იქნება შესაძლებელი.
