-
2015-05-30 04:52
რუსეთის საგარეო საქმეთა სამინისტროს მიერ დაფუძნებული “გორჩაკოვის ფონდის“ საქართველოს ფილიალის - „რუსულ-ქართული საზოგადოებრივი ცენტრის“ ხელმძღვანელი, ისტორიკოსი ზაზა (ზაალ) აბაშიძე ხელნაწერთა ეროვნული ცენტრის დირექტორად დაინიშნა.
„გორჩაკოვის ფონდი“ რუსეთის პუტინის წინამორბედი პრეზიდენტის დიმიტრი მედვედევის განკარგულებით 2010 წელს შეიქმნა და მისი მიზანი არის საზღვარგარეთ რუსეთის იმიჯის ამაღლება, რისთვისაც გასცემს გრანტებს, ატარებს სემინარებს, კონფერენციებს და ხელს უწყობს სტუდენტების გაცვლით პროგრამებს რუსეთში.
ფონდ „რუსსკი მირთან“ ერთად, ის რუსეთის „რბილი ძალის პოლიტიკის“ ერთ-ერთი უმთავრესი ინსტრუმენტია და მის მუშაობასთან დაკავშირებულები არიან გავლენიანი რუსი პოლიტიკოსები და ოლიგარქები. მათ შორის, სერგეი ლავროვი, ევგენი პრიმაკოვი, კონსტანტინ კოსაჩევი, „ლუკოილის“ მფლობელი ვაგიფ ალეკპეროვი, მილიარდერი ალიშერ უსმანოვი და ა.შ.
სხვა რუსულ არასამთავრობო ორგანიზაციებთან ერთად, „გორჩაკოვის ფონდი“ საქართველოში გააქტიურდა 2012 წელს, ხელისუფლების ცვლილების შემდეგ და მისი საქმიანობის მიზანია საქართველოში საზოგადოებრივი აზრის რუსეთის ინტერესების შესაბამისად ფორმირება, ანუ დასავლური ინსტიტუტების და ღირებულებების დისკრედიტაცია და რუსეთის იმიჯის ამაღლება.
„გორჩაკოვის ფონდმა“, საქართველოში მოქმედ „საერთაშორისო ურთიერთობათა ინსტიტუტთან“ თანამშრომლობით საკუთარი ფილიალი მალევე, 2013 წელს დააფუძნა და მისი საბჭოს ხელმძღვანელად დაინიშნა ზაზა (ზაალ) აბაშიძე, რომელიც ამავდროულად არის ინსტიტუტის დამფუძნებელი.