2014-12-07 01:54

მოსკოვში მდებარე, რუსეთში ერთერთ უმთავრეს სასულიერო სასწავლებლად მიჩნეული მოსკოვის სასულეირო აკადემიის სტუდენტები რუსეთის მართლმადიდებელი ეკლესიის მაღალი იერარქიის წარმომადგენლებს ადანაშაულებენ. სკანდალმა პრესაშიც გაჟონა და მის შესახებ „ალტერნატივნაია გაზეტა“ წერს.

საინტერესოა, რომ თავად რუსეთის პატრიარქ კირილის მიმართ სტუდენტები დადებითად არიან განწყობილნი: მას მადლობას უხდიან აკადემიის დახმარებისთვის და საერთო საცხოვრებლის მოწყობისთვის, მაგრამ სასულიერო აკადემიის რექტორს არქიეპისკოპოს ევგენის, რომელიც, ამავდროულად, რუსეთის ეკლესიის საგანმანათლებლო კომიტეტს ხელმძღვანელობს და რუსეთის ყველა საეკლესიო უმაღლეს სასწავლებლებს კურირებს, მრავალ ცოდვაში ამხელენ.

„არქიეპისკოპოსი მხოლოდ ძვირადღირებულ კურორტებში სიარულითაა დაკავებული, მთელი ოცი წლის განმავლობაში, რაც რექტორია“, - წერენ სტუდენტები, - „ამისთვის ის ფულს მოხუცების იმ ბინების გაყიდვით შოულობნს, რომლებსაც მარტოხელები მოსკოვის სასულიერო აკადემიას უანდერძებენ ხოლმე. არადა, ამ მოხუცებთან მათ გარდაცვალებამდე სასულიერო აკადემიის სტუდენტები დადიან და მათთვის საკვები მიაქვთ, ასევე, ბინას ულაგებენ.

ამასთან, სტუდენტების თქმით, აკადემიის კედლკებში გამეფებულ გარყვნილებას რექტორი არათუ ხელს არ უშლის, არამედ ხელს უწყობს კიდეც თავისი უმოქმედობით, ხოლო იქ, სტუდენტების თქმით, ძალიან ცუდი ამბები ხდება.

„სწავლული ბერ-მონაზვნები“ რეგულარულად აწყობენ ღრეობას 50-ე აკადემიურ კორპუსში, იქ კი, ძირითადად, აკადემიის ახალ სტუდენტებს იწვევენ, რომლებსაც მერე სექსუალური სიახლოვისკენ უბიძგებენ და არცთუ უშედეგოდ, რადგან გეი-კავშირები აკადემიაში ჩვეულებრივ ამბად იქცა. ამ მხრივ განსაკუთრებით გამოირჩევა ეპისკოპოსი ნიკოლოზი (აშიმოვი), რომელსაც სტუდენტებმა „მაშენკა“ შეარქვეს.

როცა ის ჩვეულებრივი მონაზონი იყო, სტუდენტებთან სექსუალურ სიახლოვეში გახლდათ შემჩნეული. რექტორმა მისი ეს ცოდვები შესანიშნავად უწყოდა, მაგრამ ამას ხელი არ შეუშლია მისთვის, კარგი დახასიათება გაეცა, როცა აშიმოვის ხედასხმის საკითხი წყდებოდა და საბოლოოდ, მას ხელი დაასხეს ამურის ეპარქიის ეპისკოპოსად“, - აცხადებენ აკადემიის სტუდენტები და მას უფრო დიდ ბრალდებას უყენებენ:

„ამურის ეპარქიაში აშიმოვი მარტო არ გამგზავრებულა. მან აცდუნა სემინარიის სტუდენტი, რომელიც იმ პერიოდში გოგოსთან მეგობრობდა, დააშორა მას და დაარწმუნა, წაჰყოლოდა ამურსკის კომსომოლსკზე“.

წერილში იღუმენ ანდრიასაც ამხელენ და წერენ, რომ ის არაერთხელ გამოიჭირეს გეი-პორნოს ყურების დროს საკუთარ კელიაში, რის შესახებაც რექტორსაც აცნობეს, მაგრამ მას ზომები არ მიუღია, ხოლო კიდევ ერთი იღუმენ გერასიმეს, სრულიად მოურიდებლად მიჰყავდა აკადემიაში ქალების ფორმაში გამოწყობილი ტრანსსექსუალები, - ამბობენ სტუდენტები. მათი თქმით, რადგან რექტორი ამ პირებს მფარველობს და მათ წინააღმდეგ არ მოქმედებს, არის საფუძველი ეჭვისთვის, რომ ის ტვითონაა გეების ლობისტი აკადემიაში.

სტუდენტები აკადემიიდან პროტოდიაკონ ანდრეი კურაევის განდევნასაც იხსენებენ და წერენ, რომ ის ამ ცოდვის მოწინააღმდეგე იყო, რის გამოც რექტორმა აკადემიიდან გააგდო. სტუდენტები ხაზს უსვამენ, რომ არქიეპისკოპოსი ევგენი დიდი ხანია, მეგობრობს მოსკოვში კარგად ცნობილ ჰომოსექსუალ იღუმენ პეტრესთან (ერემიევი), რომელიც მან სტავროპოლიდან მოსკოვში გადმოიყვანა და პრორექტორადაც დანიშნა, ხოლო მას შემდეგ, რაც პეტრეს სექსუალური დაინტერესება სტუდენტებით არაერთხელ გამოვლინდა, ის ხაბაროვსკში ახლადგახსნილ სემინარიაში პირველ პრორექტორად მიავლინა.

იქაურმა რექტორმა ვერ აიტანა მისი გარყვნილება და უკანვე გამოუშვა, რის შემდეგაც არქიეპისკოპოსმა ევგენიმ მისი პროტეჟე მოსკოვში რუსეთის მართლმადიდებელი უნივერსიტეტის რექტორად დანიშნა.

სტუდენტების მიერ გამოთქმულ ბრალდებებს ამ დრომდე არანაირი ოფიციალური გამოხმაურება არ მოჰყოლია რუსეთის მართლმადიდებელი ეკლესიის ხელმძღვანელობისგან.

წყარო