2013-07-30 12:09

სასჯელაღსრულების რუსთავის მე-17 დაწესებულებაში მოშიმშილე 30-დე პატიმართაგან ერთის მდგომარეობა ამ დროისთვის უკიდურესად გართულებულია.

ამის შესახებ ჟურნალისტებს სასტუმრო "რადისონში" გამართულ შეხვედრაზე სასჯელაღსრულების, პრობაციისა და იურიდიული დახმარების მინისტრმა სოზარ სუბარმა განუცხადა.

მისი ინფორმაციით, ამ პატიმარს დღეს, სავარაუდოდ, საავადმყოფოში გადაიყვანენ. მინისტრი განმარტავს, რომ მოშიმშილეთა მოთხოვნების დაკმაყოფილება მის მიერ დაქვემდებარებული სამინისტროს ძალებს აღემატება, რადგან მოთხოვნათა ნაწილის გადაწყვეტა სასამართლოს, ხოლო ნაწილის - ცალკეული ორგანოების პრეროგატივაა.

"ისინი, ასევე ითხოვდნენ პარლამენტის წევრებთან შეხვედრას და როგორც ვიცი, აპირებენ კიდეც დეპუტატები ამას, ასე რომ, ეს მოთხოვნა გათვალისწინებულია", - აღნიშნავს სოზარ სუბარი.