2017-02-08 12:04

8 თებერვალს, დაახლოებით დილის 6:12 საათზე (კიევის დროით) ე.წ. დონეცკის სახალხო რესპუბლიკის ყველაზე ცნობილი "ბოევიკი" მიხეილ ტოლსტიხი, მეტსახელად "გივი" მოკლეს. ამის შესახებ ცნობილი ჟურნალისტი იური ბუტუსოვი თავის გვერდზე წერს. 

ჟურნალისტი წერს, რომ ინფორმაცია, ფაქტობრივად, დადასტურებულია ე.წ. დონეცკის სახალხო რესპუბლიკის თავდაცვის მინისტრისა და ატო-ს ზონაში მოქმედი სხვა ტერორისტული ორგანიზაციების წრეებში.

მიხეილ ტოლსტიხი, იგივე "გივი" ბატალიონ "სომალის" მეთაური იყო და განსაკუთრებული ცინიზმითა და სისასტიკით გამოირჩეოდა. წინასწარი ინფორმაციით, "გივი" საკუთარ კაბინეტში ააფეთქეს. ე.წ. დონეცკის სახალხო რესპუბლიკის ხელმძღვანელობამ მომხდარი შეაფასა, როგორც ტერაქტი. 

ბოლო პერიოდში "გივი" ავდეევკისთვის გამართულ ბრძოლებში მონაწილეობდა და დაიჭრა კიდეც. 

შეგახსენებთ, რამდენიმე თვის წინ უკრაინის ანტიტერორისტული ოპერაციის ზონაში კიდევ ერთი ცნობილი "ბოევიკი", "მოტოროლას" სახელით ცნობილი არსენ პავლოვი ლიფტში ააფეთქეს, ხოლო რამდენიმე დღის წინ ე.წ. ლუგანსკის სახალხო რესპუბლიკის მილიციის უფროსი, პოლკოვნიკი ანაშენკო საკუთარ ავტომანქანაში აფეთქებით გამოასალმეს სიცოცხლეს.