2014-03-11 14:18

„ქვეყნებმა, რომლებიც უკრაინას ტერიტორიული მთლიანობის გარანტიას აძლევდნენ, ქვეყნის სუვერენიტეტის დამოუკიდებლობა უნდა დაიცვან“, - ამის შესახებ უმაღლესი რადას ტრიბუნიდან უკრაინის პრემიერმინისტრმა, არსენი იაცენუკმა განაცხადა.

„ქვეყანა, რომელმაც უარი თქვა ბირთვულ იარაღზე და მიიღო გარანტია, დაუცველი დარჩა და ერთი ერთზე აღმოჩნდა კბილებამდე შეიარაღებულ სახელმწიფოსთან, რომელიც ქიმიურ იარაღს ფლობს“, - აღნიშნა იაცენუკმა.

მან ასევე მიმართა უკრაინისთვის გარანტიის მიმცემ ქვეყნებს: „თუ თქვენ არ უზრუნველყოფთ ამ გარანტიებს, მაშინ აგვიხსენით, როგორ დაარწმუნებთ ირანსა და ჩრდილოეთ კორეას, უარი თქვან ბირთვულ იარაღზე?“

იაცენუკმა უმაღლეს რადას მოუწოდა, ხმა მისცენ გარანტიის მიმცემი ქვეყნებისადმი დაკისრებული მოვალეობების შესრულების მოთხოვნას და მოსთხოვონ უკრაინის სუვერენიტეტის დაცვა.