2020-04-27 14:59

ჩინეთს არ აქვს ინფორმაცია, ჩრდილოეთ კორეის ლიდერის, კიმ ჩენ ინის ჯანმრთელობის მდგომარეობის შესახებ. ამის შესახებ ქვეყნის საგარეო საქმეთა სამინისტროს პრესსპიკერმა, გენგ შუანგმა “როიტერსის“ ინფორმაციის კომენტირებისას განაცხადა, როცა გავლენიანმა მედიასაშუალებამ გასულ კვირას დაწერა, რომ პეკინმა ფხენიანში სამედიცინო ჯგუფი გაგზავნა.

„პირველ რიგში, მინდა გკითხოთ, რომელ წყაროზე დაყრდნობით გაავრცელეთ ეს ინფორმაცია. ჩვენ ჩრდილოეთ კორეაში გავგზავნეთ სამედიცინო ტესტები. ჩინეთი ებრძვის კორონავირუსის გავრცელებას და ეხმარება იმ სახელმწიფოებს, რომელთაც ეს სჭირდებათ. კიმ ჩენ ინის ჯანმრთელობის მდგომარეობის შესახებ ინფორმაცია არ გვაქვს“,-აღნიშნა პრესსპიკერმა.

ცნობისთვის, გასულ კვირას რამდენიმე გავლენიანმა მედიასაშუალებამ გაავრცელა ინფორმაცია, რომ კიმ ჩენ ინს გულის ოპერაცია ჩაუტარდა, რის შემდეგაც მისი მდგომარეობა კრიტიკულია. ინფორმაციას არ ადასტურებენ სამხრეთ კორეაშიც.