2016-05-17 13:53

დღეს, „ახალი პოლიტიკური ცენტრი - გირჩი“- ს თავმჯდომარემ ზურა ჯაფარიძემ ხელისუფლებისგან გამომცემლების წინაშე აღებული ვალდებულების შესრულების მოთხოვნით პრესკონფერენცია გამართა. 

პრობლემის არსი შემდეგში მდგომარეობს, 2011 წელს, განათლების მინისტრის, დიმიტრი შაშკინის მიერ გამომცემლებთან დაიდო ხელშეკრულება, რომელშიც სამინისტრომ ჩაწერა, რომ ,,აუცილებელი საზოგადოებრივი საჭიროების” შემთხვევაში მინისტრს ეძლეოდა შესაძლებლობა დაქირავებულთან ცალმხრივად გაეწყვიტა კონტრაქტი და ჩამოერთმია საკუთრება.

2013 წელს, ქართულმა ოცნებამ და გიორგი მარგველაშვილმა, წინასაპრეზიდენტო კამპანიის ერთერთ პოპულისტურ და მთავარ დაპირებად განათლების ხარჯების შემსუბუქება გააჟღერეს და მოსწავლეთათვის სახელმძღვანელოების უფასოდ დარიგების ინიციატივით გამოვიდნენ.

,,ქართულმა ოცნებამ“ გამოიყენა წინა განათლების მინისტრის დროს დადებული ხელშეკრულების "ბუნდოვანი” მუხლი და ზემოთ ხსენებული ინიციატივის განხორციელებისათვის გამომცემლებთან კონტრაქტი ცალმხრივად გაწყვიტა, რითიც უხეშად დაარღვია მათი საკუთრებისუფლება.

„მიუხედავად იმისა, რომ არ გვაქვს ხელისუფლების კეთილგონიერების იმედი, ახალი პოლიტიკური ცენტრი „გირჩი“ მოუწოდებს ხელისუფლებას, ერთი კვირის ვადაში აუნაზღაუროს გამომცემლობებს უკვე გაწეული სამუშაო და თუ ეს არ მოხდება, ჩვენ სხვა გზებს მივმართავთ. ვმუშაობთ ამ გზებზე. საუბარია სრულიად ახალ ხარისხიან

სახელმძღვანელოებზე და ვცდილობთ ეს სახელმძღვანელოები მივიდეს მათთან, ვისთვისაც აუცილებელია. თუ ამას სახელმწიფო არ გააკეთებს, ჩვენ ამას აუცილებლად მივაღწევთ“, - განაცხადა ზურაბ ჯაფარიძემ.