2026-04-17 14:25

ქართული ესტრადის ერთ-ერთი გამორჩეული წარმომადგენელი, ნინო ჩხეიძე მსმენელს ახალ მუსიკალურ ნამუშევარს სთავაზობს და უკვე აანონსებს პროექტს, რომელიც, როგორც თავად ამბობს, განსაკუთრებული ემოციითა და განსხვავებული ხასიათით გამოირჩევა.

მომღერალმა სოციალურ ქსელში გააზიარა პოსტი, სადაც გულწრფელად საუბრობს შემოქმედებით პროცესზე და აღნიშნავს, რომ ახალი სიმღერა სწორედ მუდმივი ძიებისა და ინსპირაციის შედეგად შეიქმნა. მისი თქმით, ხელოვანი ადამიანისთვის განვითარება და სიახლეების აღმოჩენა აუცილებელია, ხოლო ეს ნამუშევარი სწორედ ამ გზის შედეგია.

„ხელოვანი ადამიანები მუდამ ახლის ძიებაში ვართ… და სწორედ ასეთ ძიებაში დაიბადა ეს ძალიან საინტერესო და განსხვავებული ნამუშევარი,“ — წერს მომღერალი.

ნინო ჩხეიძე განსაკუთრებულად უსვამს ხაზს იმ ფაქტს, რომ სიმღერაზე მუშაობის პროცესი მისთვის დიდი სიამოვნება იყო, ხოლო მიღებული შედეგი – ემოციურად ძალიან მნიშვნელოვანი. როგორც ის ამბობს, ეს იქნება კომპოზიცია, რომელიც მსმენელს დიდხანს დაამახსოვრდება და განსაკუთრებულ შთაბეჭდილებას მოახდენს.

ახალი სიმღერა პროფესიონალთა გუნდთან ერთად შეიქმნა. მუსიკის ავტორია ADIKA, ტექსტზე იმუშავა ირინა სანიკიძემ, არანჟირება კი ეკუთვნის ზაზა ხუბუკელაშვილს, ხოლო ვიდეორგოლზე მუშაობს ლევან გაბაძე.

პოსტის დასასრულს მომღერალი მადლობას უხდის ყველა იმ ადამიანს, ვინც ამ პროექტის შექმნაში მიიღო მონაწილეობა და მსმენელს სიურპრიზსაც ჰპირდება — სიმღერა და ვიდეოკლიპი ძალიან მალე გამოჩნდება.

ახალი ნამუშევრის მიმართ მოლოდინი უკვე დიდია, განსაკუთრებით იმის გათვალისწინებით, რომ ნინო ჩხეიძე ხშირად ახერხებს მსმენელისთვის განსხვავებული და ემოციური ჰიტების შეთავაზებას.