არასამთავრობო ორგანიზაციათა ქსელის „ევრაზიული არჩევანი - საქართველო“ წევრები, რომლებიც უკრაინელი ჟურნალისტების დაკავების გაპროტესტებას აპირებდნენ, ოდესაში არ შეუშვეს, - ამის შესახებ არჩილ ჭყოიძემ რუსულ მედიასაშუალებებს განუცხადა.
„როგორც ცნობილია, უკრაინაში, ოდესის ოლქში, ოფიციალური კიევისგან განსხვავებული მოსაზრებების გამო ჟურნალისტები არტემ ბუზილა და ელენა გლიშენსკაია დააკავეს. ამასთან, ბუზილას მიმართ წამების სასტიკი მეთოდები გამოიყენეს“, - ამბობს არჩილ ჭყოიძე და ამატებს, რომ მიხეილ სააკაშვილი ოპონენტებს ისევე ეპყრობა, როგორც ამას საქართველოში აკეთებდა.
მისი თქმით, დღეს ოდესაში ჟურნალისტებისადმი სოლიდარობის ნიშნად მხარდამჭერი აქცია იყო დაგეგმილი და ოდესაში ჩავიდა ახალგაზრდული ფღტის წარმომადგენელი მამუკა ზანდუკელი, რომელიც ქვეყანაში არ შეუშვეს და აეროპორტში ამყოფეს“, - ამბობს არჩილ ჭყოიძე.
მამუკა ზანდუკელი კოალიციის ახალგაზრდული ფრთისა და თავად კოალიციაში შემავალი „ერეკლე მეორის საზოგადოების“ ლიდერია.
არტემ ბუზილა ინტერნეტგაზეთ «Взаправду» («Насправдi») რედაქტორი და "ვზგლიადის" უშტატო კორეპონდენტია. მისი წერილები პრორუსული პოზიციით იყო გამორჩეული. ის მოძრაობა "ბესარაბიის სახალხო რადის" ერთერთი დამფუძნებელია და ოდესის პროფკავშირების სახლში 2014 წლის 2 მაისს მომხდარ ტრაგედიაში, ძირითადად, ამჟამად უკრაინის ხელისუფლებაში მყოფ პირებს ადანაშაულებდა. ბუზილას ბრალად ედება "უკრაინის ტერიტორიული მთლიანობის ხელყოფა", რაც 10 წლამდე თავისუფლების აღკვეთას ითვალისწინებს.