2015-03-31 09:32

"ქრონიკა+" სამეგრელოში პრემიერმინისტრ ირაკლი ღარიბაშვილის ვიზიტის კულუარულ დეტალებზე წერს. როგორც ცნობილია, ზუგდიდიდან ანაკლიაში მიმავალ ირაკლი ღარიბაშვილს წითელი ბარათები დაახვედრეს, თუმცა, იყო სხვა კურიოზებიც.

"უშუალოდ ანაკლიაში, იმ ადგილს, სადაც ღარიბაშვილი უნდა გაჩერებულიყო და მშენებლობისა და ანაკლიის პორტის დაგეგმვის შესახებ ინფორმაცია უნდა მოესმინა, ძალოვნებმა რამდენიმე საათით ადრე შემოარტყეს ალყა და შიგნით არავის უშვებდნენ.

მაშინ ადგილობრივმა „პროტესტანტებმა“ სხვა გზა მონახეს: სააკაშვილის ხელისუფლების დროს დაწყებული მშენებლობების ბოლო ნაწილზე მოექცნენ და წითელი ბარათები იქ გამოფინეს, რომლებსაც პრემიერი ჯიუტად არიდებდა თვალს. უფრო კრეატიულები ზღვაში ნავითაც გავიდნენ, სადაც დიდი წითელი ნაჭერი ჰქონდათ გამობმული: ნაპირიდან ესეც მშვენივრად ჩანდა...

ანაკლიაში არნახულად აქტიურობდა პრემიერის დაცვა: ასე მაგალითად, მათ ერთი მამაკაცი პირდაპირ ჰაერში ასწიეს, როცა ის ღარიბაშვილთან მიახლოებასა და წერილის გადაცემას ცდილობდა. საინტერესო ის იყო, რომ იმ პირებს, ვინც სააკაშვილის დაცვის უხეშობაზე მოთქმით გოდებდა, ამაზე ხმაც არ ამოუღიათ...

და ბოლოს, კიდევ ერთი, კომიკური დეტალი: პრემიერის ვიზიტის წინადღეს ზუგდიდის მუნიციპალიტეტის ყველა სამსახურის მუშაკებს თათბირი ჩაუტარეს, იქედან ნაწილი აარჩიეს და ზუგდიდი-ანაკლიის გზის ყოველ 500 მეტრიან მონაკვეთზე დგომა უბრძანეს.

რატომ? თავს ნუ გადაიღლით, ვერ გამოიცნობთ: მათ საქონლის დაფრთხობა ევალებოდათ, ანუ, იმის უზრუნველყოფა, რომ ესკორტის ჩავლის დროს ახლომახლო არცერთი ძროხა, კამეჩი და ღორი არ ყოფილიყო. რადგან სამეგრელოში ადგილობრივებს უფრო მეტად ძროხები ჰყავთ ხოლმე, ეს აქციაც სწორედ ძროხების წინააღმდეგ მიმართული გამოვიდა.

საჯარო მოხელეები ხუმრობდნენ კიდეც, ეტყობა, ჩვენს პრემიერს დედოფლისწყაროში ძროხები არ უნახავსო,ხოლო ერთი ზუგდიდელი კოლორიტი ხუმრობის ხასიათზე დადგა, გზაზე გამწკრივებულ საჯარო მოხელეებს ჩამოუარა და მათ ურჩევდა, წითელი ნაჭრები მოემარაგებინათ, ოღონდ არა „წითელი ბარათის“, არამედ „წითელი ნაჭრის“ სახით, იმ შემთხვევისთვის, თუ გზაზე არა „დედალი ძროხა“, არამედ „მამალი ძროხა“ ანუ ხარი შეხვდებოდათ:

„აუფრიალებთ ნაჭერს მატადორებივით და გაიტყუებთ ტრასიდან, მაგარი მეთოდია, იდეისთვის წახალისება მეკუთვნის“, - ეუბნებოდა ენაკვიმატი ზუგდიდელი მათ..."

გაზეთი "ქრონიკა +"