იმის გამო, რომ მოქალაქეთა უკმაყოფილება იზრდება და ეს, ძირითადად, სოციალურ სფეროს უკავშირდება, „ნაციონალური მოძრაობის“ მიერ საპროტესტო აქციების გამართვას ზურაბ ჭიაბერაშვილი არ გამორიცხავს.
ამის შესახებ ჭიაბერაშვილმა „პრაიმტაიმის“ პრესკლუბში განაცხადა, როცა მას შეკითხვა დაუსვეს, უკავშირდება თუ არა 10 000 სახელმწიფო დროშის შესყიდვის შესახებ პარტიის მიერ გამოცხადებული ტენდერი შესაძლო საპროტესტო აქციებს. ზურაბ ჭიაბერაშვილის ტქმით, ტენდერის შესახებ ინფორმირებული არ არის, საპროტესტო აქციების გამართვაში კი მოულოდნელი არაფერი იქნება:
"ის რომ" ნაციონალურმა მოძრაობამ" შეიძლება პერიოდულად რაღაც აქციები დაგეგმოს ამაში გასაკვირი არაფერია, ქვეყანაში თუ არის შეკრებების მანიფესტაციების კანონი და სიტყვის თავისუფლება, ბუნებრივია, ასეთი აქციები შეიძლება გაიმართოს. მიმდინარე პერიოდში რაიმე კონკრეტული შემიძლია გითხრათ რომ არ იგეგმება, თუმცა დღევანდელ ხელისუფლებას ისე მიყავს საქმე, რომ ნაციონალურ მოძრაობას, მე ვფიქრობ, რომ დიდი ორგანიზება არ დაჭირდება, საზოგადოებაში საკმაოდ იმატებს უკმაყოფილება, განსაკუთრებით ეს ეხება ლარის კურსის ვარდნას, ეკონომიკური მდგომარეობის გაუარესებას, რაც თვალნათელია, რომ ძალიან ბევრი მოქალაქის ჯიბეზე და ოჯახის კეთილდღეობაზე აისახება", – განაცხადა ზურაბ ჭიაბერაშვილმა „პრაიმტაიმის“ პრესკლუბში.
