2015-01-28 11:54

რუსეთის დუმის დეპუტატს, გენადი ზიუგანოვს  სტრასბურგში ევროსაბჭოს საპარლამენტო ასამბლეის შენობასთან უკრაინული დიასპორის წევრებმა აქცია მოუწყვეს და სხდომაზე შესვლაში ხელი შეუშალეს.

უკრაინის უმაღლესი რადას დეპუტატმა დმიტრი ლინკომ არეულობით ისარგებლა, ზიუგანოვს სისხლის მაგვარი სითხე შეასხა და სახეში ალიყური უთავაზა.

ასე გააპროტესტეს სტრასბურგში მოქმედი უკრაინული დიასპორის წევრებმა რუსეთის შეიარაღებული აგრესია უკრაინაში.

თავად ზიუგანოვი ცემის ფაქტს უარყოფს და აცხადებს, რომ შენობაში შესვლისას მას ორი უცნობი თავს დაესხა, თუმცა სერიოზული არაფერი მომხდარა. ამასთან მან აღშფოთება გამოთქვა იმის გამო, რომ ასეთი ინციდენტი ევროსაბჭოს შენობიდან ერთ მეტრში, დახურულ ზონაში მოხდა, სადაც ადამიანების შეშვება სპეციალური საშვებით უნდა ხდებოდეს.

ზიუგანოვის მტკიცებებისგან განსხვავებით საპირისპიროს ადასტურებს დმიტრი ლინკოს მიერ გამოქვეყნებული ფოტო, რომელზეც ზიუგანოვი სახეზე ხელაფარებული დგას.

ევროსაბჭოს საპარლამენტო ასამბლეის შენობასთან მოწყობილი აქციის წევრები უკრაინის უმაღლესი რადისა და ევროსაბჭოს საპარლამენტო ასამბლეის დეპუტატის ნადეჟდა  სავჩენკოს გათავისუფლებასაც მოითხოვდნენ, რომელიც უკვე 6 თვეა მოსკოვის წინასწარი დაკავების იზოლატორში იმყოფება შეთითხნილი ბრალდებით და მისი უფლებები ირღვევა.

როგორც აქციის ორგანიზატორმა, უკრაინელმა დეპუტატმა დმიტრი ლინკომ აღნიშნა, აქციის მიზანია ევროსაპარლამენტო ასამბლეიდან რუსული დელეგაცია დაითხოვონ.

ამ ეტაპზე  ასამბლეაში რუსულ დელეგაციას ხმის უფლება ჩამოართვეს უკრაინაში გაგრძელებული შეარაღებული აგრესიისა და ყირიმის ოკუპაციის გამო. ნიდერლანდების დელეგაციას კი მზად აქვს კანონპროექტი, რომლის მიღების შემთხვევაში რუს დეპუტატებს უფლებამოსილება საერთოდ შეუწყდებათ.

ამასთან ევროსაბჭოს საპარლამენტო ასამბლეამ უკვე დაუმტკიცა უფლებები დეპუტატს უკრაინიდან  ნადეჟდა  სავჩენკოს, რის შემდეგაც ევროსაბჭოს საპარლამენტო ასამბლეის დიპლომატის იმუნიტეტის მქონე დეპუტატის პატიმრობაში ყოფნა ეწინააღმდეგება ვენის კონვენციის პრინციპებს.