კლუბ „Ночные волки“ („ღამეული მგლები“)–ს ბაიკერები ყირიმში სახელმწიფო შენობებს დაიცავენ. ბაიკერთა პირველმა ნაკადმა უკვე დააწესა მორიგეობა სევასტოპოლის ადმინისტრაციის შენობასთან.
კლუბის ერთერთი წევრის ალექსანდრე ლიზუნოვის თქმით, ისინი აპირებენ გააკონტროლონ ასევე სახელმწიფო დაწესებულებათა შენობები სიმფეროპოლში, რათა ოპოზიციის მხრიდან აგრესიული ქმედებები არ დაუშვან:
„ჩვენ არ დავუშვებთ, რომ ყირიმში სიტუაციაზე კონტროლი დაიკარგოს“, – განაცხადა ლიზუნოვმა, მეტსახელად „კატოკმა“.
შეგახსენებთ, რომ „Ночные волки“ 14 ოქტომბერს მცხეთაში, სვეტიცხოვლობის დღესასწაულზე იყო ჩამოსული და მათ წმინდა ადგილები მოილოცეს. საქარტველოში მათი ვიზიტის შესახებ ინფორმაცია „იტარ ტასმა“ გაავრცელა, ხოლო „მოამბემ“ ექსკლუზიური რეპორტაჟი მოამზადა, რომელიც მასალას ვიდეოს სახით ერთვის.
ბაიკერები აცხადებდნენ, რომ საქართველოში რუსეთს დაქვემდებარებული უკრაინის საპატრიარქოსა და საქართველოს საპატრიარქოს შორის მიღწეული შეთანხმების მიხედვით ჩამოვიდნენ. ბაიკერებს საქართველოში ალექსანდრე ზალდასტანოვი, მეტსახელად „ქირურგი“ მეთაურობდა.
„Ночные волки“ ცნობილია, როგორც რუსეთში ჯერ კიდევ სსრ კავშირის არსებობის დროს, 80–იანი წლების ბოლოს აღმოცენებული ბაიკერების ჯგუფი, რომლებიც თავიანთ თავს არა ბაიკერებს, არამედ „რუს მოტოციკლისტებს“ უწოდებენ. ამ ჯგუფთან რუსეთსა და უკრაინაში არაერთი კრიმინალური ფაქტია დაკავშირებული, ზოგიერთი რუსული მედიასაშუალება კი მათ პირდაპირ „კრიმინალებად“ და „ქილერებად“ მოიხსენიებს.
ცნობილია ასევე, რომ „Ночные волки“ ვლადიმირ პუტინთან დაახლოებული დაჯგუფებაა. ისინი თავიანთ თავს რუსეთის ისტორიისა და ტრადიციების დამცველებად მიიჩნევენ.
ლაშა ბერულავა
ფოტოზე: "ქირურგი" ვლადიმირ პუტინთან ერთად