ჩრდილოეთ კორეის ლიდერი კიმ ჩენ ინი, რომელსაც ცოტა ხნის წინ გულის ოპერაცია ჩაუტარეს, სავარაუდოდ, მძიმე მდგომარეობაშია, - ამის შესახებ ინფორმაციას ტელეკომპანია CNN-ი ავრცელებს. ტელეკომპანიის ინფორმაციით, ეჭვი კიმ ჩენ ინის ჯანმრთელობის მძიმე მდგომარეობის შესახებ მას შემდეგ გაჩნდა, რაც ის ბაბუის იუბილესთან დაკავშირებით გამართულ საზეიმო ღონისძიებას არ დაესწრო.

გაეროს წევრმა ქვენებმა გენერალურ ასამბლეაზე მიიღეს რეზოლუცია, რომელიც ითვალისწინებს თანაბარ და დროულ წვდომას კორონავირუსის ვაქცინაზე, რომელსაც მომავალში მიიღებენ. რეზოლუცია ასევე ხაზს უსვამს პანდემიასთან ბრძოლის დროს მსოფლიო ჯანდაცვის ორგანიზაციის უმნიშვნელოვანეს როლს და კიდევ ერთხელ მოუწოდებს მსოფლიოს ქვეყნებს თანამშრომლობისკენ.

იტალია მიმდინარე კვირის ბოლოსთვის კორონავირუსის გამო დაწესებული ზომების მოხსნის გეგმას გაასაჯაროებს. ამის შესახებ ქვეყნის პრემიერ-მინისტრმა, ჯუზეპე კონტემ განაცხადა.

ბოლო 24 საათის განმავლობაში, სამართალდამცველების მიერ განხორციელებული მონიტორინგის შედეგად, მთელი ქვეყნის მასშტაბით, საგანგებო მდგომარეობის რეჟიმის და ე.წ. კომენდანტის საათის შეზღუდვების დარღვევის 182 ახალი ფაქტი გამოვლინდა. ამის შესახებ „აფხაზეთის ხმას“ შსს-დან აცნობეს.

ინფექციური საავადმყოფოს სამედიცინო დირექტორის მარინა ეზუგბაიას განცხადებით, კლინიკაში მოთავსებული კორონავირუსით ინფიცირებული 44 პაციენტიდან 2 პაციენტი პრობლემურია. მისივე ინფორმაციით, 7 მოზარდისა და 9 თვის ბავშვის ჯანმრთელობის მდგომარეობა დამაკმაყოფილებელია.

აჭარის ავტონომიური რესპუბლიკის ჯანმრთელობისა და სოციალური დაცვის მინისტრის მოადგილის, ნინო ნიჟარაძის განცხადებით, აჭარაში დღეს კორონავირუსით დაინფიციების ახალი შემთხვევა არ დაფიქსირებულა.

ვახტანგ ბოჭორიშვილის სახელობის კლინიკის სამეთვალყურეო საბჭოს თავმჯდომარის, მაკა სოლოღაშვილის განცხადებით, კლინიკას კორონავირუსით ინფიცირებული ერთი ახალი პაციენტი დაემატა. მიისვე ინფორმაციით, ახალი პაციენტის ე. წ. ბოლნისის კლასტერს უკავშირდება და მისი მდგომარეობა დამაკმაყოფილებელია.

დაკავებულ პოლიციელს სოსო გაბრიაძეს, რომლის მიერ უმისამართო გასროლილ ტყვიასაც ქალი ემსხვერპლა, ოფიციალურად ბრალს სავარაუდოდ, დღეს წაუყენებენ. აღნიშნულის შესახებ  სამართალდამცავის ადვოკატმა განაცხადა.

საქართველოში კორონავირუსით ინფიცირების შემთხვევათა რაოდენობა 6-ით გაიზარდა და 408 გახდა. ამის შესახებ ინფორმაცია მთავრობის მიერ შექმნილ სპეციალურ ვებ-გვერდზე stopcov.ge-ზე არის განთავსებული. კარანტინის რეჟიმშია 4779 ადამიანი, ხოლო სტაციონარში მეთვალყურეობის ქვეშ - 561 პირი.

საქართველოს თავდაცვის სამინისტროში კატეგორიულად უარყოფენ გავრცელებულ ინფორმაციას,რომლის თანახმადაც 8 სამხედრო მოსამსახურეს კორონავირუსი დაუდასტურდა.