2020-04-22 20:01

გირჩევთ, სათანადო პირობები შეუქმნათ დასაქმებულებს, რადგან დაავადებულებმა, არ იარონ სამსახურში. ნუ დაჩაგრავთ მათ, თუკი დაავადების გამო დარჩებიან სახლში, თუნდაც ეს არ იყოს Covid-19, გარწმუნებთ, ასე სჯობს, - ამის შესახებ დაავადებათა კონტროლის ეროვნული ცენტრის გადამდებ დაავადებათა დეპარტამენტს ხელმძღვანელმა ხათუნა ზახაშვილმა განაცხადა. მისივე თქმით, ამით ისინი დაიცავენ სხვა დასაქმებულების ჯანმრთელობას.

"აცადეთ მათ გამოჯანმრთელება, რაც არ უნდა იყოს ამ დაავადების მიზეზი, თუნდაც იყოს სხვა რესპირაციული მიზეზი, გარწმუნებთ, ასე სჯობს. დამსაქმებლები თუ უფრო მეტად იზრუნებენ თავის დასაქმებულთა ჯანმრთელობაზე, მხოლოდ და მხოლოდ წაადგებათ. იმიტომ რომ ერთი Covid-19 -ით დაავადებული შეიძლება გახდეს მათი საქმიანობის, ბიზნესის დროებით შეჩერების ან შეფერხების მიზეზი. გირჩევთ, რომ შეუქმნათ სათანადო პირობები იმისთვის, რომ დაავადებულებმა არ იარონ სამსახურში," - განაცხადა ზახაშვილმა.

ამასთან, დაავადებათა კონტროლის ეროვნული ცენტრის ხელმძღვანელმა მიმართა მოსახლეობას და სთხოვა, რომ ტემპერატურის ქონისას არ მივიდნენ არც სამსახურში და არც საზოგადოებრივი თავშეყრის ადგილებში.