2020-04-22 21:05

ოკუპირებულ აფხაზეთში, კორონავირუსით დაინფიცირებული მესამე პაციენტის მდგომარეობა დამძიმდა. 1925 წელს დაბადებული ქალის მდგომარეობა ფასდება, როგორც მძიმე. ამის შესახებ ე.წ. მოსახლეობის დაცვის საკითხზე მომუშავე ოპერატიული შტაბი იუწყება.

მათი ინფორმაციით, პაციენტი გუდაუთის საავადმყოფოში მკურნალობს. ჯერ კიდევ გუშინ შტაბი იუწყებოდა, რომ მისი მდგომარეობა სტაბილური და საშუალო სიმძიმის იყო.

რაც შეეხება პირველ პაციენტს, რამდენიმე დღეში მისი გაწერა იგეგმება, მეორე დაინფიცირებული კი გუდაუთის საავადმყოფოდან 21 აპრილს გაეწერა.

გასული დღე-ღამის განმავლობაში ოკუპირებულ აფხაზეთში კოვიდინფექციაზე ტესტი შვიდმა ადამიანმა ჩაიტარა, რომელთაგან ყველას პასუხი უარყოფითი იყო.