რომელი კომპანია დაამზადებს პირველკლასელთათვის ,,ნეთბუკებს“ ამას განათლების სამინისტრო გადაწყვეტს. განათლების მინისტრმა თამარ სანიკიძემ მთავრობისგან სსიპ „საგანმანათლებლო და სამეცნიერო ინფრასტრუქტურის განვითარების სააგენტოს" მიერ სახელმწიფო შესყიდვის გამარტივებული წესით განხორციელებაზე თანხმობა მიიღო.
სანიკიძის განცხადებით, რამდენიმე დღეში გადაწყდება, თუ რომელი კომპანია დაამზადებს პირველკლასელებისთვის „ნეთ-ბუკებს".
„ბუკების გამარტივებულ შესყიდვაზე მივიღეთ დასტური. ახლა ვბრუნდები სამინისტროში, მოვიკითხავ რა მდგომარეობაშია წარმოდგენილი მოდელები და მათთან დაკავშირებული ხარჯები. ხვალ ან ზეგ გადაწყდება, რომელი კომპანია დაამზადებს ტექნიკას პირველ კლასელებისთვის", - განაცხადა განათლების მინისტრმა.
განათლების სამინისტროს საგანმანათლებლო ინფრასტრუქტურის განვითარების სააგენტომ რამდენიმე თვის წინ გამოცხადებული ტენდერი გააუქმა. პირველ ტენდერში მონაწილეობა ორმა კომპანიამ „იუ-ჯი-თიმ" და „ალგორითმმა" მიიღო.
შეთავაზებული ფასის მიხედვით პირველ ეტაპზე კომპანია „იუ-ჯი-თი" გავიდა თუმცა ტექნიკური დოკუმენტაციებში ხარვეზის გამო კომპანიას დისკვალიფიკაცია მიეცა და ატომატურად კომპანია ,,ალგორითმი“ უნდა გამოცხადებულიყო გამარჯვებულად, თუმცა ,,იუ-ჯი-თიმ“ წამოაყენა წინადადება, რომ ის ხარვეზებს გამოასწორებდა და ხარჯებსაც შეამცირებდა, რის შემდეგაც ტენდერი ჩაიშალა და გადაწყდა ტექნიკის პირდაპირი წესით შესყიდვა.
დღევანდელ მთავრობის სხდომაზე კი გადაწყდა, რომ გადაწყვეტილებას განათლების სამინისტრო მიიღებს.