2014-06-28 11:23

საქართველოს საგარეო საქმეთა მინისტრ მაია ფანჯიკიძის განცხადებით, რუსეთის საგარეო საქმეთა მინისტრ სერგეი ლავროვის თავდაცვითი რეაქციების შესახებ განცხადება, ვაჭრობის რეჟიმს ეხებოდა.

ამით საქართველოს საგარეო საქმეთა მინისტრი მაია ფანჯიკიძე "რუსთავი 2"-ის გადაცემა "კვირის თემა"-ში ჩართვისას რუსი კოლეგის, სერგეი ლავროვის განცხადებას გამოეხმაურა, სადაც ლავროვი ამბობს, რომ კრემლი თავდაცვით ზომებს მიიღებს, თუ საქართველოს, მოლდოვასა და უკრაინის ევროკავშირთან ასოცირების შეთანხმებას ნეგატიური შედეგები ექნება დსთ-ს თავისუფალი სავაჭრო ზონისთვის.

როგორც მაია ფანჯიკიძემ აღნიშნა, ქართული მხარე ამის შესახებ ინფორმირებულია და ეს არ იყო ამ ტიპის პირველი განცხადება. "სწორედ ამის გამოძახილია, რომ 7 ივლისს შედგება პირველი შეხვედრა ქართველი და რუსი ექსპერტების დონეზე, რომლებიც განიხილავენ ტექნიკურ დეტალებს, თუ რა შეიცვლება მას მერე, რაც საქართველო აამოქმდეებს დროებით გამოყენებაში ასოცირების ხელშეკრულებას", - აღნიშნა ფანჯიკიძემ. 

რაც შეეხება კითხვას, ხომ არ შეექმნებათ საფრთხე ქართველ ბიზნესმენებს, საგარეო საქმეთა მინისტრმა განაცხადა, რომ ქართულ ბიზნესს საფრთხე კი არა განვითარების უკეთესი პირობები შეექმნება, რადგან მათთვის 500 მილიონიანი, ყველაზე მსხვილი ბაზარი იხსნება. 

"რაც შეეხება რუსეთის ბაზარზე შესაძლო საფრთხეს, სწორედ ამ საუბრების საშუალებით, რომელიც დაგეგმილი გვაქვს, ამ საფრთხეებს თავიდან ავიცილებთ და გარდა ამისა შევძლებთ იმისაც, რომ რუსული ბიზნესი დავაინტერესოთ საქართველოში ინვესტიციებით, რადგანაც ნებისმიერი ინვესტორი მიიღებს იმ სარგებელს, რომელიც ღრმა და ყოვლისმომცველი თავისუფალი სავაჭრო სივრცით იგულისხმება", - აღნიშნა მინისტრმა. 

მისივე თქმით, ხელშეკრულების რატიფიცირება საქართველოს პარლამენტში ივლისის შუა რიცხვებში მოხდება. "ხოლო დროებითი გამოყენება, რაც ნიშნავს იმას, რომ ამ ხელშეკრულების ძირითადი, დიდი ნაწილი ამოქმედება მალე, ეს დაიწყება სექტემბერში", - განმარტა ფანჯიკიძემ. 

როგორც ფანჯიკიძემ აღნიშნა, დოკუმენტის 28 სახელმწიფოს მიერ რატიფიცირებას შეიძლება ერთი წელი დასჭირდეს, მაგრამ ეს არ შეაფერხებს თავისუფალი ვაჭრობის დიდი ნაწილის ამოქმედებას. "მთავრობა მზადყოფნაშია, რომ დროებითი გამოყენება დაიწყოს", - დასძინა საგარეო საქმეთა მინისტრმა.