2014-06-27 10:21

საერთაშორისო საზოგადოებამ და ყველა ჩვენგანმა 2008 წელს მიღებული ძირითადი გადაწყვეტილებები ბოლომდე ვერ მივიყვანეთ , - ამის შესახებ საქართველოს პრეზიდენტმა, გიორგი მარგველაშვილა ბათუმში მიმდინარე თავდაცვისა და უსაფრთხოების კონფერენციაზე განაცხადა. მისი თქმით, 2008 წლის კონფლიქტი არ იყო ბოლომდე გაანალიზებული. 

"უზარმაზარი პრობლემების წინაშე აღმოვჩნდით წლის დასაწყისში უკრაინაში. ჩვენ უნდა გავიზიაროთ პასუხისმგებლობის საკუთარი წილი იმასთან დაკავშირებით რაც უკრაინაში მოხდა. ფაქტიურად, 2008 წლის კონფლიქტი არ იყო ბოლომდე გაანალიზებული, გადაწყვეტილებები სწრაფად არ იყო მიღებული და ასევე მტკიცე გადაწყვეტილებები არ იყო მიღებული ყირიმის ოკუპაციასთან დაკავშირებით. ძირითადი გადაწყვეტილებები, რომელიც მიღებული იქნა 2008 წელს, არ შესრულდა ბოლომდე. საერთაშორისო საზოგადოებამ, ყველა ჩვენგანმა, ეს გადაწყვეტილებები ბოლომდე ვერ მივიყვანეთ", - განაცხადა მარგველაშვილმა. 

მისივე თქმით, ამ საკითხების მოგვარება დავიწყებას არ უნდა მიეცეს. 

"ჩვენ მტკიცედ ვაცხადებთ, რომ უკრაინის პრობლემების მოგვარება უნდა მოხდეს დასავლელი პარტნიორების ჩართულობით და, რა თქმა უნდა, უკრაინელი მეგობრების მონაწილეობით. ეს საკითხები უნდა მოგვარდეს, არ უნდა მიეცეს მივიწყებას და დღის წესრიგიდან არ უნდა იქნეს მოხსნილი", - აღნიშნა პრეზიდენტმა.