-
2016-06-30 13:51
რამდენიმე წამყვანი თურქული მედიასაშუალება წერს, რომ სტამბოლოს ათათურქის აეროპორტში მომხდარი ტერაქტის კვალს ჩეჩნური დაჯგუფების წევრებთან მივყავართ, სახელდება რამდენიმე გვარი, მათ შორის, ახმედ ჩატაევის, რომელიც საქართველოში იხდიდა სასჯელს და ციხიდან პროკურატურის მოთხოვნით გათავისუფლდა.
თურქული მედია ასკვნის, რომ ტერაქტში მონაწილე ერთერთი პირი, შესაძლოა, ოსმან ვადინოვი იყოს. ამის შესახებ თურქული გამოცემა Hurriyet-ი წერს. გამოცემის თანახმად, თურქული სპეცსამსახურები ვარაუდობენ, რომ ის სტამბოლში სირიის ქალაქ რაქადან ჩავიდა, რომელიც დაჯგუფება „ისლამური სახელმწიფოს“ არაოფიციალურ დედაქალაქად მიიჩნევა. წყაროებმა უსაფრთხოების სამსახურიდან დაუდასტურეს სააგენტო „როიტერს“, რომ სამი თვითმკვლელიდან სულ მცირე ერთი უცხო ქვეყნის მოქალაქე იყო.
გაზეთი Yeni Safak კი წერს, რომ ტერაქტის ორგანიზატორი, შესაძლოა, ახმედ ჩატაევი, ჩეჩენი ტერორისტი იყოს, რომელიც თავდაპირველად დოკუ უმაროვის თანამოაზრე და თანამებრძოლი იყო, მისი მოკვლის შემდეგ კი "ისლამურ სახელმწიფოს" მიეკედლა. შეგახსენებთ, ახმედ ჩატაევი საქართველოში 2012 წელს, ლაფანყურის სპეცოპერაციისას დააკავეს, ხოლო ხელისუფლების შეცვლის შემდეგ, უკვე დეკემბერში, ნანა კაკაბაძის შუამდგომლობითა და პროკურატურის მოთხოვნით, პატიმრობა გირაოთი (5.000 ლარი) შეუცვალეს და გაათავისუფლეს.
ახმედ ჩატაევი, "ნეტგაზეთის" ფოტო
თავდაპირველად თურქულმა მედიამ გაავრცელა ინფორმაცია, რომ ტერაქტში ტაჯიკური წარმოშობის პირები იყვნენ ჩართული, თუმცა, თურქეთის ხელისუფლებამ ეს ფაქტი ოფიციალურად უარყო. ხელისუფლება ოფიციალურად არც იმას ადასტურებს, რომ ტერორისტები ეთნიკური ჩეჩნები არიან და აცხადებს, რომ ტერორისტების ვინაობა ჯერ საბოლოოდ არ არის იდენტიფიცირებული.