-
2014-07-18 00:17
აწ გარდაცვლილი, სამაუწყებლო კომპანია "რუსთავი-2"-ის თანადაფუძნებელი ეროსი კიწმარიშვილი 2012 წლის 25 დეკემბერს არჩევს ირმა ინაშვილის ინტერვიუს ბიძინა ივანიშვილთან, სადაც მილიარდერი ეროსი კიწმარიშვილის მიმართ უარყოფით, ხოლო ქიბარ ხალვაშის მიმართ დადებით ემოციებს არ მალავს.
ბიძინა ივანიშვილი ამბობს, რომ ეროსი კიწმარიშვილს ერთხელ შეხვდა და მაშინაც ძალით შეახვედრეს, ასევე საუბრობს ბევრ საინტერესო დეტალზე, რომელსაც შემდეგ კომენტარს "პრაიმტაიმის" პრესკლუბში ეროსი კიწმარიშვილი უკეთებს.
ბიძინა ივანიშვილის თქმით, ეროსი კიწმარიშვილმა "პარტნიორები გააცურა და ძირითადი თანხა თავად აიღო". ეროსი კიწმარიშვილი ამ მომენტისთვის განსაკუთრებული ყურადღების მიპყრობას ითხოვს: "მიაქციეთ ყურადღება, თურმე მე გავაცურე ჩემი პარტნიორები და ავიღე ძირითადი თანხა, თუმცა, რა თანხაა ეს, არსად ჩანს".
ივანიშვილი ინაშვილთან ინტერვიუში "მეცხრე არხის" პირველი დახურვის შესახებაც საუბრობს და ამბობს, რომ იმ დროს "მეცხრე არხი" სათადარიგო იყო, რადგან "რუსთავი-2" თავს კარგად ართმევდა დაკისრებულ მოვალეობას, ოპოზიციის ფუნქციას". ეროსი კიწმარიშვილი ამ ფრაზასაც ეხმიანება და ამბობს, რომ ყურადღებაა მისაქცევი ერთ ფაქტზე - იმ დროს, როცა "რუსთავი-2" თურმე კარგად ართმევდა თავს საქმეს, მე ვიყავი მისი გენერალური დირექტორი".
სწორედ "პრაიმტაიმის" პრესკლუბში 2012 წლის მიწურულს ჩატარებული ეროსი კიწმარიშვილის ეს ბრიფინგი გახდა განხილვის თემა ტვ "ტაბულაში", სადაც პრესკონფერენციის ეს და სხვა დეტალები წინ "თეორემის" წამყვანმა და "ტაბულას" დამფუძნებელმა თამარ ჩერგოლეიშვილმა წამოსწია.
შენიშვნა: წარმოდგენილია "პრაიმტაიმში" ეროსი კიწმარიშვილის მიერ ჩატარებული ბრიფინგის სრული ვერსია.