2016-02-26 14:23

როგორც "პირველი რადიო" იტყობინება, ყოფილი სახელმწიფო მინისტრი, "თავისუფალი დემოკრატების" ერთერთი ლიდერი ალექსი პეტრიაშვილი შეიარაღებული თავდასხმის მსხვერპლი გახდა - ის დაჭრილია და რესპუბლიკურ საავადმყოფოში იმყოფება.

ალექსი პეტრიაშვილს უცნობმა პირებმა ფეხში სამი ტყვია ესროლეს, მისი ჯანმრთელობის მდგომარეობა დამაკმაყოფილებელია. პეტრიაშვილს გადაუდებელი სამედიცინო დახმარება უტარდება. პარტიის ლიდერი თავდასხმასთან დაკავშირებით საგანგებო განცხადებას გააკეთებს. 

შსს-ს განცხადების მიხედვით, ალექსი პეტრიაშვილი ორივე ფეხშია დაჭრილი. გამოძიების წინასწარი ინფორმაციით, თავდასხმის მომენტში ალექსი პეტრიაშვილი ყოფილი დიპლომატის - ლევან მიქელაძის საფლავზე სამ მეგობართან ერთად იმყოფებოდა.

მომხდარის შესახებ შეტყობინება გადაუდებელი დახმარების ოპერატიული მართვის ცენტრ 112-ში ახლომდებარე საცხოვრებელ კორპუსში მცხოვრები მოქალაქისგან შევიდა.

შინაგან საქმეთა სამინისტროს ქალაქ თბილისის პოლიციის დეპარტამენტმა გამოძიება საქართველოს სისხლის სამართლის კოდექსის 117-ე მუხლით დაიწყო, რაც ჯანმრთელობის განზრახ მძიმე დაზიანებას გულისხმობს.

შემთხვევა საბურთალოს პანთეონის ძმათა სასაფლაოს ტერიტორიაზე მოხდა. შსს მიმართავს ფაქტის თვითმხილველ პირებს, დანაშაულის დროულად გამოძიების მიზნით, ითანამშრომლონ სამართალდამცავ ორგანოებთან.