2016-01-18 08:27

მოკლული პროკურორის ვახტანგ ქირიას ძმა - ელდარი სამართალდამცველებს მადლობას უხდის. მისი თქმით, მათ რომ ეფექტურად არ ემუშავათ, ის ძმის ცხედარს ვერ ჩამოასვენებდა, რადგან მას გააქრობდნენ. 

„ჩემი ძმა, რომ ჩამოასვენეს და გარდაცვლილი ფიზიკურად აქ არსებობს, ეს არის პროკურატურის, პოლიციის, სამართალდამცავების მუშაობის შედეგი. მათ, რომ არ ემუშავათ და ყველაფერი არ გაეკეთებინათ ამისთვის, ძმას მე აქ ვერ ჩამოვასვენებდი. ამის გვამი გამქრალი იქნებოდა“, - განაცხადა ელდარ ქირიამ, ზუგდიდში ვახტანგ ქირიას ცხედრის გადასვენების შემდეგ, ჟურნალისტებთან საუბრისას. 

სამეგრელო-ზემო სვანეთის საოლქო პროკურატურის განყოფილების უფროსი პროკურორი, ვახტანგ ქირიას ცხედარი სამართალდამცველებმა 16 იანვარს ღამით ვაჟა-ფშაველას მე-7 კვარტალში, 24-ე კორპუსის პირველ სართულზე მდებარე ბინაში იპოვეს. ის ცეცხლსასროლი იარაღით იყო მოკლული.