რადიოს მოყვარულებს Comedy Group-მა საჩუქარი გაუკეთა, Fm 99.3-ზე მაუწყებლობა კომედი რადიომ დაიწყო.იდეა Comedy Group-სა და ნინო ჩხეიძეს ეკუთვნის.
პირველ ეტაპზე იგეგმება იუმორისტული ტიხრებისა და მინი „სკეჩების“ ეთერში გაშვება,უახლოეს მომავალში კი რადიო ახალ, საინტერესო და სახალისო გადაცემებს შემოგვთავაზებს. რაც შეეხება პროგრამას, ის გათვლილია იუმორისა და გემოვნებიანი მუსიკის მოყვარულებზე.
ამ დროისთვის, კომედი რადიოს დაფარვის ზონა დედაქალაქი და იმერეთის რეგიონია, თუმცა უახლოეს მომავალში იგეგმება მთელი საქართველოს მასშტაბით მაუწყებლობა. როგორც იდეის ერთ-ერთმა ავტორმა, ალეკო მალხაზიშვილმა „ვინიუსთან“ საუბარში აღნიშნა, რადიო მსმენელის განწყობაზე იზრუნებს და მათ პოზიტიურად დამუხტავს.
„გვინდა იმაზე უფრო მხიარულად მოუსმინონ რადიოს, ვიდრე ადრე უსმენდნენ. ამასთანავე, გაჟღერდება იუმორისტული სიმღერები და სკეჩები იმ ადამიანთა შესრულებით, ვინც ქართულ საზოგადოებას უყვარს. მსმენელს ბევრს საინტერესო იუმორისტულ გადაცემასაც ვპირდებით“,- განაცხადა მალხაზიშვილმა.
კომედი რადიოს გაკეთების იდეაზე „ვინიუსთან“ ვანო ჯავახიშვილმა ისაუბრა.
„იდეა გაგვიჩნდა იქიდან გამომდინარე, რომ ერთადერთი, სადაც არ ვიყავით, ეს იყო რადიო სივრცე. ამას გარდა, რადიო ის ტერიტორიაა, რომელიც იუმორის მხრივ არაა ათვისებული. ამიტომ ვიფიქრეთ, რომ ძალიან პოპულარული იქნებოდა ჩვენ მიერ შექმნილი ახალი რადიო, რომელსაც „Comedy რადიო“ დავარქვით.
ჩვენი ტელეპროგრამები ტელემაყურებლის ყველა სეგმენტზეა გათვლილი. მივიჩნიეთ, რომ რადიოს ფორმატიც ყველა სეგმენტზე უნდა იყოს გათვლილი. იმიტომ, რომ ჩვენ ყველა ასაკის მაყურებელი გვყავს. ამ ფორმატის რადიომ, წესით, უნდა გაამართლოს. პირველ ეტაპზე გადაცემებს არ ვაკეთებთ. დაახლეობით ორი თვის განმავლობაში ეთერში გადაცემები არ იქნება. ფორმატის აღქმისთვის ეთერი ტიხრებითა და მინისკეტჩებითაა გაჯერებული.
ზოგადად, ჩვენი პერსონაჟებით აგებულ გადაცემებს ვგეგმავთ. მაგალითად, გაგიმხელთ, რომ ერთ-ერთი გადაცემა ბიძინა ივანიშვილისა და მიშა სააკაშვილის პაროდისტების დიალოგზე იქნება შექმნილი და მასში ხალხი იქნება ჩართული. რადიოს ოცდაოთხსაათიანი მუსიკალური ეთერი ექნება.
პრაიმტაიმ ზონებში დაახლოებით 70% ჩვენი პროდუქციით დაიტვირთება. ამ დროისთვის, მრავალფეროვნებისათვის ჩვენი იუმორისტული სიმღერების არქივის მასალები გადის ეთერში.
გადის ჩვეულებრივი მუსიკაც - 2000 წლიდან ამ დრომდე, თანამედროვე უცხოური პოპმუსიკა. „Comedy რადიო“ “Comedy Group-ის” პროდუქტია. პროექტის პარტნიორია ვიდეოპორტალი „vitube.ge“. პორტალზე ჩვენი არტები აიტვირთება და რადიოს პირდაპირი ეთერიც აქ იქნება მიბმული“ - განაცხადა ვანო ჯავახიშვილმა.
vinews.ge
