2014-09-26 09:49

ჩინეთში საქართველოს ყოფილი ელჩი და გადაცემა "ვის უნდა ოცი ათასის" წამყვანი მამუკა გამყრელიძე ქართული ხასიათის თავისებურებებზე წერს, რომლებიც ქართველების ცალკეულ ახირებებში იჩენს თავს.

"ჩემი მოკრძალებული აზრით (რომელიც თავისთავად ფრიად სუბიექტურია) ქართველების დიდი უმრავლესობა დარწმუნებულია, რომ მისი პირადი შეხედულებები ამა თუ იმ მოვლენაზე ერთადერთი და უტყუარი ჭეშმარიტებაა, აქედან გამომდინარე სხვისი აზრი როგორც მინიმუმ მცდარია და მაქსიმუმ მავნე და ამისათვის განსხვავებული აზრის მატარებელი უნდა დაისაჯოს. დასჯის მეთოდები გემოვნებისა და სისხლში ჰორმონალური ფონის სიმაღლის მიხედვით ვარირებს.

საშუალო სტატისტიკურ ქართველი მამაკაცი დარწმუნებულია, რომ ყველაზე უკეთ გაუძღვება ქვეყნის ფეხბურთის ნაკრებს, საშუალო სტატისტიკური ქალი დარწმუნებულია, რომ მისი გაკეთებული საცივი ყველას სჯობია, ხოლო საშუალო სტატისტიკური ბავშვი დარწმუნებულია, რომ ტრიგონომეტრია კი იცის, მაგრამ მასწავლებელს ამოჩემებული ჰყავს და ამიტომ უწერს ორიანებს. რა თქმა უნდა ეს უტრირებაა, მაგრამ სწორედ განსხვავებული აზრის მიუღებლობა და კრიტიკის მიმართ აგრესია არის ქართველების მთავარი პრობლემა.

აქედანაა ის ტოტალური უმეცრებაც. სწავლა რა საჭიროა, როცა ისედაც ყველაფერი იცი. ჩვენი პერსპექტივა მესახება როგორც ერთმანეთის პერმანენტული ჭამა და ძვლების ტკვერა. საქართველო გაბრწყინდება !